ABŞ fentanil sanksiyaları çərçivəsində üç Meksika bankını hədəfə alıb

ABŞ Xəzinədarlığı fentanil sanksiyaları çərçivəsində Meksikadakı üç maliyyə qurumu — CIBanco, Intercam Banco və Vector Casa de Bolsa ilə bəzi əməliyyatları qadağan edib. FinCEN bu bankları çirkli pulların yuyulması ilə bağlı riskli elan edib. Mütəxəssislər bu addımın Meksikanın maliyyə sisteminə ciddi təsir göstərə biləcəyini deyir.

Meksika Maliyyə Nazirliyi sübut tələb etsə də, ABŞ-dən qənaətbəxş cavab verilməyib. Banklar bütün ittihamları rədd edib, qeyri-qanuni fəaliyyətlə əlaqələrinin olmadığını bildiriblər. ABŞ Xəzinədarlığı bu qurumların Meksika kartelləri adından milyonlarla dolların yuyulmasında və fentanil prekursorlarının alınmasında iştirak etdiyini iddia edib.

Ekspertlər bu tədbirlərin ABŞ maliyyə sistemindən kənarlaşdırma effekti verdiyini deyir. Hüquqşünas Luis Manuel Perez de Acha qeyd edib ki, ABŞ üzərindən keçən maliyyə axınına görə bu banklar faktiki olaraq əməliyyatsız qala bilər. Bu addım, Trampın Meksikaya qarşı ticarət təzyiqlərini artıran başqa bir maneə kimi qiymətləndirilir.

Reuters
Qəmər Kazımzadə