ABŞ hərbi gəmisi Karib dənizində zərbədən sağ qalanları saxlayır

ABŞ Hərbi Dəniz Qüvvələrinin gəmisi Karib dənizində ABŞ-nin vurduğu və iki nəfərin öldüyü şübhəli narkotik daşıyan gəmidən xilas edilən iki nəfəri saxlayır. Bu barədə "Reuters"ə adlarının açıqlanmasını istəməyən üç mənbə məlumat verib.

Hadisə Prezident Donald Trampın Venesueladan qaynaqlandığını iddia etdiyi "narkoterror" təhlükəsinə qarşı elan etdiyi müharibə fonunda baş verib. ABŞ Müdafiə Nazirliyi məsələ ilə bağlı açıqlama verməyib.

Mənbələrdən birinin bildirdiyinə görə, zərbəyə məruz qalan gəmi suyun altına batıb və narkotik qaçaqmalçıları tərəfindən gizlənmək üçün istifadə edilən yarım sualtı qayıq ola bilər. ABŞ ordusu helikopter vasitəsilə iki sağ qalanı xilas edərək hərbi gəmiyə gətirib.

Tramp administrasiyası bundan əvvəlki oxşar əməliyyatlarda 27 nəfərin öldüyünü açıqlayıb, lakin sağ qalan olmayıb. Bu əməliyyatlar hüquq ekspertləri və bəzi demokrat siyasətçilər arasında "müharibə qanunlarına uyğunluq"la bağlı narahatlıq yaradıb.

ABŞ Karib dənizində hərbi qüvvələrini artırıb: bölgədə raket daşıyan esmineslər, F-35 qırıcıları, nüvə sualtı qayığı və 6 500 hərbçi yerləşdirilib.

Venesuela BMT Təhlükəsizlik Şurasına müraciət edərək, ABŞ-nin zərbələrinin beynəlxalq hüquqa zidd olduğunu və ölkənin suverenliyinə hörmət edilməsini tələb edib.

Reuters
Sura Əliyeva