Almaniya Ukraynaya təhlükəsizlik dəstəyi verəcək

Almaniyanın vitse-kansleri və maliyyə naziri Lars Klinqbayl Kiyevə ilk səfəri zamanı ölkəsinin Ukrayna üçün təhlükəsizlik təminatlarında iştirak edəcəyini bildirib.

“Qərb alyansı olaraq biz artıq Ukrayna ilə təhlükəsizlik təminatları məsələsində birgə işləyirik. Bu proses hələ ilkin mərhələdədir, lakin tam aydındır, Almaniya da məsuliyyəti öz üzərinə götürəcək”, – deyə Klinqbayl bəyan edib.

Onun sözlərinə görə, məqsədə çatmaq üçün Ukrayna ordusunun gücləndirilməsi və ölkə daxilində silah istehsalının artırılması vacibdir. Klinqbayl həmçinin qeyd edib ki, hər hansı danışıqlar yalnız atəşkəslə başlaya bilər: “Bu o deməkdir ki, Vladimir Putin qətliamı dayandırmaq üçün hərəkət edir".

ABŞ Prezidenti Donald Tramp müharibənin tezliklə bitməsini istəsə də, Kiyev və onun müttəfiqləri bunun Rusiyanın şərtləri əsasında ola biləcəyindən narahatdırlar.

“İndi top Putinin tərəfindədir. Əgər o, ədalətli və davamlı sülhə həqiqi maraq göstərirsə, növbəti addımı atmalıdır”, – Klinqbayl əlavə edib.

O, Ukraynanın danışıqlara cəlb edilməsinin vacibliyini vurğulayıb: “Daimi sülh üçün həm atəşkəs, həm də etibarlı təhlükəsizlik təminatları zəruridir.”

Bu həftə Ukraynanın gələcək təhlükəsizliyi ilə bağlı müzakirələrdə Fransa Prezidenti Emmanuel Makron və Böyük Britaniyanın Baş naziri Keir Starmer, koalisiya çərçivəsində qoşun yerləşdirilməsi ideyasını dəstəkləyiblər. Almaniyada isə müxalifət lideri Fridrix Mers məsələ ilə bağlı açıq mövqe nümayiş etdirsə də, daxildə və xaricdə sərt tənqidlərə məruz qala bilər.

Klinqbaylın rəhbərlik etdiyi nazirliyin məlumatına görə, Almaniya müharibənin başlanğıcından bəri Ukraynaya 50,5 milyard avro (59,18 milyard dollar) dəstək göstərib.

ANEWZ 

Güllər Gülhüseynova