Almaniyanın Köln şəhərindəki Ford zavodunun işçiləri tətilə çıxıb

Almaniyanın Köln şəhərində 1930-cu ildən bəri fəaliyyət göstərən və 11 min 500 nəfərin çalışdığı Ford zavodunda işçilər tətilə başlayıblar.

Mərkəzi ABŞ-də yerləşən avtomobil istehsalçısı Ford-un Avropa mərkəzi olan Köln zavodunda çalışan işçilər, 2027-ci ilə qədər işçi sayını 2 min 900 nəfər azaltmağı planlaşdıran zavod rəhbərliyinə qarşı tətil keçirirlər.

IG Metall həmkarlar ittifaqının çağırışı ilə işçilər yerli vaxtla saat 04:30-da erkən növbə ilə tətilə başlayıblar. Məlumata görə, tətil növbəli şəkildə sabah səhər növbəsinə qədər davam etdiriləcək.

Ford-un Köln zavodunda həmkarlar ittifaqının çağırışına qoşulan işçilərin əksəriyyətinin tətilə qatılması nəticəsində bu səhərdən etibarən istehsal xətlərinin demək olar ki, tamamilə dayandığı bildirilib.

Aralarında çoxsaylı türklərin də olduğu işçilər, 2027-ci ilə qədər iş yerlərinin azaldılması planına qarşı aparılan danışıqlarda şirkətə təzyiqləri artırmaq istəyirlər.

TRT Xəbər 

Nuray Əliyeva