Böyük Britaniya Balkan insan alveri şəbəkələrinə sanksiyalar tətbiq edib

Böyük Britaniya çərşənbə günü insan alverində istifadə olunan saxta sənədləri hazırlayan və bu qanunsuz miqrasiyanın maliyyələşdirilməsində iştirak edən Balkan mənşəli cinayətkar qruplara qarşı sanksiyalar tətbiq edib.

Baş nazir Keyr Starmer London şəhərində Qərbi Balkan ölkələrinin liderləri ilə keçiriləcək sammit ərəfəsində verdiyi açıqlamada bildirib:

“Qərbi Balkanlar vasitəsilə Böyük Britaniyaya qanunsuz miqrantları gətirən cinayətkar bir marşrut mövcuddur və biz Avropa tərəfdaşlarımızla birlikdə onu bağlamaqda qətiyyətliyik".

Sammitin əsas mövzularından biri qanunsuz miqrasiyanın azaldılması olacaq. Bu məsələ Britaniya seçiciləri üçün prioritet siyasi narahatlıq hesab olunur. Toplantıda həmçinin regional təhlükəsizlik və ortaq təhdidlər müzakirə ediləcək.

Hökumət açıqlamasında bildirilir ki, sanksiyalar Kosovo mənşəli “saxta sənədlər hazırlayan və onları cinayətkar qruplara satan” bir təşkilata qarşı tətbiq olunub.

Bundan əlavə, Britaniya hökuməti saxta Xorvatiya pasportlarını Balkan dəstələrinə təmin edən Xorvatiya mənşəli bir dəstənin liderinə də sanksiya qoyub.

Sanksiya siyahısına həmçinin qanunsuz miqrasiyanı asanlaşdırmaq üçün istifadə edilən kiçik qayıq hissələrinin alınması və vəsait köçürülməsi ilə məşğul olan iki şəxs və bir ticarət şirkəti də daxil edilib.

Reuters
Sura Əliyeva