Çin meqa-bəndi Hindistanda su müharibəsi qorxusu yaradıb

Hindistan hökuməti Tibetin Angsi buzlaqından başlayan Yarlung Zangbo çayında planlaşdırılan Çin meqa-bəndinin quru mövsümdə su axınını 85%-ə qədər azaldacağı ilə bağlı ciddi narahatlıq keçirir.

Bu çay Hindistanda Sianq və Brahmaputra adlanır və 100 milyondan çox insanın həyatı bu sularla bağlıdır. Arunaçal Pradeş sakinləri kəndlərin su altında qalacağı və həyat tərzinin dəyişəcəyi qorxusu ilə uzun illər bu layihələrə qarşı çıxıblar.

Çin dekabrda sərhəd bölgəsində dünyanın ən böyük su elektrik bəndini inşa edəcəyini açıqladı. Bu addım Yeni Dehlidə strateji rəqibin çaya nəzarəti silaha çevirməsi ilə bağlı narahatlığı artırdı. Hindistanın ən böyük hidroenergetika şirkəti Yuxarı Siang Çoxməqsədli Anbar layihəsini irəli çəkib və sahədə silahlı mühafizə təmin olunub. Baş nazir Narenda Modinin ofisində belə layihənin sürətləndirilməsi müzakirə edilib.

Hindistan hökumətinin təhlilinə görə, Çin layihəsi hər il 40 milyard kubmetr suyu yönləndirmək imkanı verəcək. Bu isə sərhəd nöqtəsindəki ümumi axının üçdə birindən çoxdur. Təsir əsasən musson olmayan aylarda ağır olacaq. Hindistanın Yuxarı Siang layihəsi 14 milyard kubmetrlik saxlama qabiliyyəti ilə riski qismən yumşalda bilər. Əks halda Quvahati şəhərində tədarük 25% azalacaq, bənd tikilərsə isə itki 11%-lə məhdud qalacaq.

Reuters
Qəmər Kazımzadə