Fələstin tərəfdarları Britaniyanın hərbi bazasına hücum ediblər

Fələstin tərəfdarları Britaniyanın hərbi bazasına hücum ediblər

Fələstin tərəfdarları Böyük Britaniyanın əsas hərbi bazalarından biri olan RAF Brize Norton-a daxil olaraq iki hərbi təyyarənin mühərriklərinə qırmızı boya səpiblər. Palestine Action qrupunun üzvləri bazanın təhlükəsizlik sistemini aşaraq, reaktiv mühərrikləri hədəfə alıblar və bu, ciddi təhlükəsizlik pozuntusu kimi qiymətləndirilib.

Qrupun yaydığı görüntülərdə fəalların qaranlıqda bazaya skuterlə daxil olaraq boya ilə hücum etdikləri əks olunub. Onlar bu addımı İsrailin Qəzzaya qarşı apardığı hərbi əməliyyatlara Böyük Britaniyanın dolayı dəstəyinə etiraz olaraq həyata keçirdiklərini bildiriblər. Etirazçılar qeyd ediblər ki, Britaniya hökuməti İsraili açıq şəkildə qınasa da, əməldə casus təyyarələr və yanacaqla təminat vasitəsilə dəstək verir.

Hadisə Britaniya ictimaiyyəti və rəsmiləri arasında geniş rezonans doğurub. Baş nazir Ser Keir Starmer və Müdafiə Nazirliyi bu addımı “vandalizm” və “rüsvayçılıq” adlandıraraq kəskin şəkildə qınayıblar. Müdafiə Nazirliyi bazadakı təhlükəsizlik rejimini yenidən nəzərdən keçirəcəyini açıqlayıb.

Baza ətrafında gücləndirilmiş nəzarət və patrul olsa da, fəalların bu tədbirləri aşaraq mühüm hərbi texnikanı hədəfə alması ciddi suallar doğurub. Rəsmi qurumlar insidentin əməliyyatlara təsir etməyəcəyini bildirsələr də, hadisə milli təhlükəsizlik kontekstində ciddi narahatlıq yaradıb.

Fələstin tərəfdarları isə bu cür aksiyaların davam edəcəyini və məqsədlərinin Qəzzadakı zorakılıqlara qarşı beynəlxalq diqqət çəkmək olduğunu bəyan ediblər.

Mənbə: BBC
Türkan Kərimli