İsrail, qadın girovun cəsədini göstərdiyini iddia edilən fotolardan sonra araşdırma aparır

Bazar günü həftəlik kabinet iclasında çıxış edən Baş nazir Benyamin Netanyahu bu mərhələdə İsrailin görüntülərin həqiqiliyini təsdiqləyə bilmədiyini bildirib.

“Biz ailə ilə əlaqədəyik və bütün ailələrə müvafiq məlumat verilib. Ürəklərimiz onlarla birlikdədir”,- deyə Netanyahu qeyd edib. O, İsrail hökumətinin, ölü olanlar da daxil olmaqla, bütün girovları geri gətirmək öhdəliyini vurğulayıb.

Baş nazir həmçinin, fotolarda olduğu iddia edilən girovun anası ilə danışdığını bildirib.

“Onun yaşadığı kabusu təsvir etmək çətindir. Biz onu və ailəsini qucaqlayırıq”,- deyə əlavə edib.

Həmasın hərbi qanadı şənbə günü qadın girovun Qəzzanın şimalında “İsrailin hücumu altında” olan bir ərazidə öldürüldüyünü iddia edib.

Mənbə: CNN

Nuray Qurbanlı