İsrail Rəfahda quru müharibəsini genişləndirir, ABŞ-a görə "qırmızı xətt" keçilməyib

Yüz minlərlə məcburi köçkün fələstinlinin sığındığı Rəfahda çadır şəhərciyinə hücumda azı 45 nəfərin ölməsindən sonra İsrail ordusu şəhərdəki quru müharibəsini genişləndirir.

Ordu sözçüsü çərşənbə günü verdiyi açıqlamada Qəzza-Misir sərhədi boyunca xəttə nəzarət etdiklərini qeyd edib. Qəzzanın cənubunda yerləşən Rəfahda jurnalistlər bölgəyə hava zərbələri endirildiyini bildirirlər.

İsrail ordusu çərşənbə axşamı Qəzzanın cənubunda 3 əsgərinin öldürüldüyünü, daha 3 əsgərinin isə ağır yaralandığını açıqlasa da, hadisə ilə bağlı təfərrüatlar açıqlamayıb.

Əlcəzair BMT-nin qətllərə son qoymağa çağıran qətnamə layihəsi hazırladığını açıqladı.

Əvvəlki qərarlara veto qoyan ABŞ İsrailin Rəfah əməliyyatını hələ də “böyük quru əməliyyatı” kimi görmədiyini bəyan edib.

Ağ Evin sözçüsü Con Kirbi deyib ki, Birləşmiş Ştatlar İsrailin Qəzzanın cənubunda yerləşən Rəfaha genişmiqyaslı işğala başladığına inanmır.

İsrailin Qəzza zolağında ölümcül və kütləvi dağıntılara səbəb olan hücumları nəticəsində qaçqın düşmüş yüz minlərlə dinc sakin hələ də Rəfahda qalır.

ABŞ prezidenti Co Bayden daha əvvəl demişdi ki, Rəfahın tam miqyaslı işğalı “qırmızı xətti” keçəcək.

Kirbi, genişmiqyaslı quru əməliyyatına münasibətlərində heç bir dəyişiklik olmadığını ifadə edərək, “Biz onların böyük birliklərlə, çoxlu sayda əsgərlə, sahədə bir çox hədəfə qarşı bir növ koordinasiyalı manevr etdiklərini görmədik" deyib.

İsrailin baş naziri Benyamin Netanyahu bazar günü çadır şəhərciyinə hücumu “faciəli səhv” adlandırıb, lakin Rəfah əməliyyatını davam etdirəcəyinə söz verib.

İsrail ordusu çərşənbə axşamı bildirib ki, əsgərləri Rəfahdakı “terror hədəfləri”nə qarşı fəaliyyətlərini davam etdirirlər.

Bölgədəki düşərgələrdə yaşayan bir çox insan gecə boyu şəhərin qərb hissələrinin sıx bombardmana məruz qaldığını bildirir.

İsrail ordusu Rəfahın şərqindəki mülki vətəndaşları "genişlənmiş humanitar zona" olaraq xarakterizə etdiyi sahil xəttinə getməyə çağırır.

Ordu genişlənən quru müharibəsi ilə bağlı da açıqlama verib: “Qoşunlarımız terrorçularla yaxın məsafədə döyüşür və bölgədəki terrorçu tunellərə, silahlara və əlavə terror infrastrukturuna girişləri aşkarlayır”.

Reuters xəbər agentliyi yerli səhiyyə rəsmilərinə istinadən xəbər verir ki, əl-Məvasidəki çadır ərazisinə tank mərmilərinin düşməsi nəticəsində azı 21 nəfər ölüb.

Rəfahın şərqindəki boşaldılmış ərazilərdən qaçan fələstinlilər sahil zolağında yerləşən bu çadır şəhərciyinə sığınırlar.

İsrail ordusu Əl Mavasidəki ölümlərlə bağlı iddiaları təkzib edib.

Digər tərəfdən ordu sözçüsü bazar günü baş verən yanğının HƏMAS-ın bölgədə saxladığı silahların partlaması nəticəsində baş verdiyinə inandığını bildirib.

New York Times: İsrailin istifadə etdiyi bombalar ABŞ-da istehsal olunur

“The New York Times” qəzeti İsrailin Rəfahdakı düşərgəsinə hava hücumunda istifadə edilən bombaların ABŞ-da istehsal edildiyini yazır .

Bölgədən gələn əyani sübutların New York Times jurnalistləri və silah mütəxəssisləri tərəfindən araşdırıldığı bildirilən xəbərdə, sursatın “ABŞ-da dizayn edilmiş və istehsal edilən GBU-39 bombasına aid olduğu” ifadə edildi.

“The New York Times” qeyd edir ki, ABŞ rəsmiləri “İsrailə bu cür bombalardan daha çox istifadə etməsi üçün təzyiq edir, onların fikrincə, bu, mülki əhali arasında itkiləri azalda bilər”.

ABŞ ordusunun keçmiş partlayıcı qurğuların zərərsizləşdirilməsi üzrə texniki mütəxəssisi və rəyləri New York Times məqaləsində yer alan ekspertlərdən biri olan Trevor Ball sosial media hesabından silahı müəyyən edib.

Xəbərə görə, Ball, qalan sursatlar arasında əhəmiyyətli bir detalın "GBU-39-u hədəfə yönəldən üzgəcləri idarə edən quyruq hərəkətə keçirmə sistemi" olduğunu vurğulayır.

Ball həmçinin qeyd edir ki, "silahın unikal boltun nümunəsi və qatlanan qanadların yerləşdiyi yuva dağıntılar arasında aydın görünür".

The New York Times həmçinin bildirir ki, silahı Koloradoda yerləşən aerokosmik istehsalçı ilə əlaqələndirən identifikasiya kodu, sursat qalıqlarını göstərən videoda görünə bilər.

Birləşmiş Millətlər Təşkilatı deyir ki, bir milyona yaxın insan Rəfahdakı münaqişədən qaçıb, lakin bir neçə yüz min insan hələ də bölgədə qala bilər.

Bölgədəki jurnalistlər çərşənbə axşamı səhər saatlarında minlərlə insanın eşşək və atların çəkdiyi arabalara yığılaraq şimala doğru hərəkət etməyə çalışdığını bildiriblər.

Mülki əhalinin ölümünə və artan beynəlxalq təzyiqlərə baxmayaraq, İsrail Rəfahdan geri çəkilmir.

HƏMAS son 48 saat ərzində bu bölgədə 70-ə yaxın insanın öldürüldüyünü açıqlayıb.

Mənbə: BBC turk