İsveç Baş naziri İspaniyanın siyasətini Avropa üçün təhlükə hesab edir

İsveç Baş naziri Ulf Kristersson İspaniyada miqrantların kütləvi şəkildə leqallaşdırılmasını “çox pis fikir” adlandırıb və bunun Şengen sərbəst hərəkət zonasının bütövlüyünü təhdid etdiyini bildirib.

"İnformator.az" xəbər verir ki, bu barədə o, “Financial Times”a müsahibəsində danışıb.

Kristerssonun sözlərinə görə, İspaniya hökumətinin 1 milyondan çox insan üçün başladığı leqallaşdırma proqramı Avropa İttifaqı (Aİ) liderlərinin görüşündə “qəzəb fırtınası”na səbəb olub, çünki bu addım digər ölkələrin nail olmağa çalışdığı məqsədlərə ziddir.

Almaniya, Danimarka, İtaliya və digər ölkələrin liderləri Madridin bu addımlarını kəskin tənqid ediblər.

İyulun sonunda on minlərlə qanunsuz miqrant Mərakeşdən İspaniyanın Afrikanın şimalında yerləşən muxtar şəhəri Seutaya axın edib. İspaniya hakimiyyəti böhran fonunda yaşayış məntəqəsində təhlükəsizliyin təmin olunmasına kömək məqsədilə hərbçiləri cəlb edib. İspaniya hökumətinin məlumatına görə, Seutaya çatmağa çalışarkən azı 75 nəfər həlak olub. Rabat isə 11 nəfərin öldüyünü bildirib.

Təxminən 1,2 milyon miqrant İspaniya hökumətinin leqallaşdırma proqramında iştirak etmək üçün müraciət edib. Proqram ölkənin Nazirlər Şurasının aprel ayında təsdiqlədiyi qərara əsasən həyata keçirilir.

İspaniya Baş naziri Pedro Sançes bəyan edib ki, miqrasiya olmasaydı, 2050-ci ilə qədər krallıq ÜDM-nin 19 faizini, 2075-ci ilə qədər isə 22 faizini itirərdi.