Kreml sülh planını rədd etməyə hazırlaşır

Rusiyanın rəsmiləri və dövlət mediası ABŞ-nin təklif etdiyi "sülh planının" qəbul edilməməsi üçün ictimai məlumatlandırma kampaniyasını gücləndirib.

"İnformator.az" xəbər verir ki, bu barədə ABŞ-nin Müharibə Araşdırmaları İnstitutunun (ISW) hesabatında qeyd olunur.

Analitiklər bildirir ki, Kreml cəmiyyəti yalnız Ukraynada tam qələbənin mümkün olduğuna inandırır və hər hansı güzəşt variantını rədd etməyə hazırlayır.

Rusiya Dövlət Dumasının üzvü Aleksey Çepa bəyan edib ki, istənilən sülh planı Rusiyanın tələblərinə tam uyğun olmalıdır. Digər deputat Andrey Kolesnik də Rusiyanın işğal etdiyi Ukrayna ərazilərindən imtina etməyəcəyini vurğulayıb.

ISW-nin fikrincə, Kreml ərazi kompromisslərinə hazır deyil və müharibəni davam etdirməyə üstünlük verir. Bununla belə, institut hesab edir ki, Ukrayna və Qərb Rusiyanın zəifliklərindən istifadə edərək Moskvanı real danışıqlara məcbur edə bilər.