Misirdən Qəzzədə atəşkəsə əməl olunması çağırışı

Misir hökuməti İsrail və HƏMAS-a Şarm əl-Şeyx şəhərində imzalanmış Qəzzədə atəşkəs razılaşmasına əməl etməyə çağırıb. Rəsmi Qahirə bölgədə gərginliyin yenidən artmaması və mülki əhalinin təhlükəsizliyinin təmin olunması üçün tərəfləri beynəlxalq öhdəliklərə sadiq qalmağa dəvət edib.

Misir Xarici İşlər Nazirliyinin açıqlamasında qeyd olunub ki, Qahirə sülh prosesinin davamlı olması üçün diplomatik səylərini davam etdirəcək. Nazirlik vurğulayıb ki, regional sabitlik yalnız qarşılıqlı anlaşma və dialoq yolu ilə mümkündür.

Bildirilib ki, Misir Birləşmiş Millətlər Təşkilatı və digər beynəlxalq tərəfdaşlarla birlikdə Qəzzədə humanitar vəziyyətin yaxşılaşdırılması istiqamətində fəaliyyətini davam etdirəcək. Ekspertlərin fikrincə, Misirin bu çağırışı regionda yeni toqquşmaların qarşısını almaq baxımından mühüm əhəmiyyət daşıyır. Onların sözlərinə görə, tərəflər atəşkəs razılaşmasına əməl etməsə, münaqişə yenidən alovlana bilər.

TRT Haber 

Aysun Vəliyeva