Müharibənin kölgəsində qalan insanlıq: Brüsseldə diplomatiya və soyuq qışın acı reallığı

Brüsseldə keçirilən Avropa İttifaqı sammitində Avropa liderləri və Ukrayna Prezidenti Volodimir Zelenski Rusiya-Ukrayna müharibəsinin hərbi, iqtisadi və humanitar nəticələrini müzakirə ediblər. Şəhərlərin raket və dron hücumlarına məruz qaldığı, enerji infrastrukturunun zərər gördüyü bir şəraitdə müzakirələrin əsas mövzularından biri qarşıdan gələn qışın Ukrayna əhalisi üçün yarada biləcəyi çətinliklər olub.

Müharibənin ağır nəticələri xüsusilə mülki əhalinin gündəlik həyatında hiss olunur. Estoniyanın Baş naziri Kristen Mixal qarşıdan gələn qışın çətin keçəcəyini vurğulayaraq, “Keçən qış artıq cəhənnəm idi, bu qış da yenə cəhənnəm kimi olacaq”, – deyib.

Xarkov şəhərinə edilən dron hücumları nəticəsində mülki şəxslərin həyatını itirməsi, eləcə də bombardmanlar səbəbindən bəzi bölgələrdə insanların elektrik enerjisi və istilik təchizatından məhrum qalması humanitar vəziyyətlə bağlı narahatlıqları artırır. Eyni zamanda, “Starshield” peyk sistemində yaranan fasilələr hərbi rabitə və təhlükəsizlik imkanları ilə bağlı suallar doğurur.

Sammit çərçivəsində keçirilən mətbuat konfransında səslənən suallar isə müttəfiqlər arasındakı siyasi gərginliyi də gündəmə gətirib. Jurnalistlərdən biri Zelenskidən ABŞ Prezidenti Donald Trampın yüksək enerji qiymətlərinə görə Ukraynanı günahlandırdığını düşünüb-düşünmədiyini soruşub. Zelenski bir neçə saniyəlik fasilədən sonra gülümsəyərək “Mənim cavabım budur”, – deyə bildirib.

Müzakirələrin digər istiqaməti ABŞ-ın Rusiya ilə enerji sahəsində mümkün razılaşmalarının müharibəyə təsiri ilə bağlı narahatlıqlar olub. Belə addımların Rusiyanın gəlirlərini artıraraq onun hərbi imkanlarına töhfə verə biləcəyi ilə bağlı fikirlər səsləndirilib.

Avropa İttifaqı daxilində Ukraynaya maliyyə dəstəyi və qurumun gələcək büdcəsi ilə bağlı fikir ayrılıqları da qalmaqdadır. İsveçin Baş naziri Ulf Kristersson üzv dövlətlərin Aİ büdcəsinin formalaşdırılması və maliyyə vəsaitlərinin ayrılması məsələlərində mövqelərinin bir-birindən ciddi şəkildə fərqləndiyini bildirib.

Bütün bu çətinliklər fonunda Avropa liderləri Ukraynaya dəstəyin davam etdirilməsinin vacibliyini vurğulayırlar. Bununla belə, müharibənin uzanması, enerji infrastrukturuna hücumlar və mülki əhalinin üzləşdiyi çətinliklər regionda davamlı sülhün təmin olunması ilə bağlı sualları aktuallaşdırır.

Reuters

Ayşə Cəfərova