Ən çətin vəziyyət buradadır, çox sayda rus...

Kupyanskda vəziyyət gərgin olaraq qalır. Ancaq ukraynalı müdafiəçilər indi daha çox nəzarətə sahibdirlər.

Bu sözləri Ukrayna Prezidenti Vladimir Zelenski deyib.

O, Ukrayna Silahlı Qüvvələrinin baş komandanı Aleksandr Sırski və Ukrayna Silahlı Qüvvələrinin Baş Qərargah rəisi Andrey Qnatov ilə cəbhədəki vəziyyətlə bağlı ətraflı müzakirələr apardığını deyib.

Zelenski qeyd edib ki, ən çətin vəziyyət döyüşlərin ən yüksək intensivliyinin qaldığı Pokrovsk istiqamətindədir. Çox sayda işğalçı orada cəmləşib.

Mövzu ilə bağlı hərbi ekspert Anar Şuşalı “İnformator.az”a açıqlamasında bildirib ki, ən çətin vəziyyət Pokrovskdadır:

“Ukrayna Prezidenti Vladimir Zelenskinin son bəyanatı — “Ən çətin vəziyyət Pokrovsk istiqamətindədir, çox sayda rus orada cəmləşib” — həm ölkə daxilində, həm də beynəlxalq ekspert dairələrində ciddi rezonans doğurub.

Kupyansk və Pokrovsk istiqamətlərində vəziyyətin gərginləşməsi Ukraynanın ümumi müdafiə planlamasına, əməliyyat-taktiki qərarlarına və strateji prioritetlərinə birbaşa təsir göstərir. Ukraynanın hazırkı müdafiə strategiyası əsasən elastik müdafiə və resursların prioritet bölgüsü prinsiplərinə əsaslanır. Lakin Kupyansk və Pokrovsk istiqamətlərində artan təzyiq bu modelin yenidən tənzimlənməsini zəruri edir.

Kupyansk istiqaməti Xarkov vilayətinin şimal-şərqinə nəzarət baxımından strateji əhəmiyyət daşıyır. Rusiya qüvvələrinin bu bölgədə təzyiqi artırması Ukraynanı şimal cəbhəsində əlavə qüvvələr yerləşdirməyə məcbur edir. Pokrovsk istiqaməti isə Donetsk vilayətinin dərin müdafiə xəttini qorumaq üçün həyati əhəmiyyətə malikdir.Bu vəziyyət Ukraynanın müdafiə planlamasında iki əsas nəticə doğurur: Müdafiə xətlərinin mərkəzləşdirilmiş idarə olunması və ehtiyat qüvvələrin daha çevik hərəkətliliyi;Logistik təminatın və hava hücumundan müdafiənin arxa cəbhədə gücləndirilməsi zərurəti.

Hərbi ekspert qeyd edib ki, Kupyansk və Pokrovskda artan təzyiq Ukraynanın “dinamik müdafiə” modelini daha da aktuallaşdırır — yəni hücumu dayandırmaqla yanaşı, mövqeləri qorumaq üçün taktiki geriçəkilmə və əks-hücum balansının qurulması tələb olunur:

“Zelenskinin “Ən çətin vəziyyət Pokrovskdadır” bəyanatı təkcə taktiki qiymətləndirmə deyil, həm də Rusiya ordusunun Donbasda yeni əməliyyat mərhələsinə keçdiyinin siqnalı kimi qəbul olunur.

Son aylarda Rusiya qoşunları Pokrovsk, Avdiyivka və Kuraxove istiqamətlərində hücum intensivliyini xeyli artırıb.

Pokrovsk, Donetsk vilayətinin qərbində yerləşən strateji nəqliyyat və logistik qovşaq kimi xüsusi önəm daşıyır. Onun ələ keçirilməsi Rusiyaya Donetsk vilayətinin tam işğalı üçün əməliyyat üstünlüyü qazandıra bilər. Bu mənada Zelenskinin bəyanatı həm kəşfiyyat məlumatlarına, həm də döyüş meydanındakı real vəziyyətə əsaslanan ciddi xəbərdarlıq xarakteri daşıyır”.

A. Şuşalı qeyd edib ki, Pokrovsk istiqamətində Rusiya qüvvələrinin kütləvi cəmləşməsi Ukraynanı üç əsas istiqamətdə əməliyyat-taktiki qərarlarını yeniləməyə məcbur edir:

“Mərkəzləşdirilmiş ehtiyat” konsepsiyası:Ukrayna Silahlı Qüvvələri ehtiyat hissələrin hücum istiqamətlərinə görə çevik şəkildə köçürülməsi prinsipinə keçir. Pokrovskda bu çeviklik həyati əhəmiyyət daşıyır. Artilleriya və hava müdafiəsi balansı:Rusiya hücumları əsasən artilleriya və PUA-ların dəstəyi ilə aparılır. Ukrayna isə uzaqmənzilli artilleriya və müasir hava müdafiə sistemlərini bu bölgədə cəmləşdirərək balansı qorumağa çalışır. Mülki logistikanın və infrastrukturların müdafiəsi:Pokrovsk ətrafında çoxsaylı yaşayış məntəqələrinin mövcudluğu döyüşlərin intensivləşməsi ilə humanitar və infrastruktur təhlükələrini artırır. Buna görə müdafiə planlaması artıq yalnız hərbi deyil, həm də humanitar və logistik aspektləri nəzərə almalıdır”. 

Ekspert son olaraq açıqlamasında bildirib ki, Zelenskinin bəyanatı eyni zamanda Qərbə yönəlmiş dolayı çağırış kimi də dəyərləndirilə bilər:

“Pokrovskda yaranmış kritik vəziyyət Ukraynanın hava hücumundan müdafiə sistemləri və silah tədarükü baxımından daha çox dəstəyə ehtiyacı olduğunu göstərir. Çünki bu gün Pokrovsk cəbhəsi təkcə Ukraynanın deyil, bütün Avropanın müdafiə xəttinin ayrılmaz parçasına çevrilib. Beləliklə Prezident Zelenskinin “Ən çətin vəziyyət Pokrovskdadır” bəyanatı sadəcə bir siyasi mesaj deyil — bu, ciddi hərbi-strateji xəbərdarlıqdır. Kupyansk və Pokrovsk istiqamətlərindəki gərginlik Ukraynanı müdafiə strategiyasını daha çevik, daha mərkəzləşdirilmiş və daha texnoloji əsaslı formaya gətirməyə məcbur edir”.

Ləman Mahmudlu