NATO-da İran gərginliyi: ABŞ-nin İspaniyanın üzvlüyünü dayandıracağı iddiasına cavab

İran müharibəsi ilə bağlı mövqeyinə görə İspaniyanın üzvlüyünün ABŞ vasitəsilə dayandırıla biləcəyinə dair xəbərlərdən sonra NATO açıqlama verib. Alyans bildirib ki, üzv ölkələrin fəaliyyətinin dayandırılması və ya təşkilatdan çıxarılması ilə bağlı heç bir prosedur mövcud deyil.

Reuters xəbər agentliyinin ABŞ-li bir rəsmiyə istinadən yaydığı məlumata görə, Pentaqon daxilində yazılmış bir e-poçtda Vaşinqtonun İran məsələsində mövqeyini dəstəkləməyən müttəfiqlərə qarşı bəzi tədbirlərin görülməsi təklif olunub. NATO rəsmisi BBC-yə açıqlamasında qeyd edib ki, alyansın qurucu müqaviləsində NATO üzvlüyünün dayandırılması və ya təşkilatdan çıxarılması ilə bağlı hər hansı müddəa nəzərdə tutulmayıb. Ötən ay isə Donald Tramp NATO-nu daim “tək tərəfli münasibət” kimi gördüyünü bildirərək, “Biz onları qoruyuruq, amma onlar bizim üçün heç nə etmir” fikrini səsləndirib.

 BBC NEWS
 Səmayə Səftərova