PKK-nın qüvvələrini Türkiyə ərazisindən çıxarması
Türkiyə, ABŞ və Avropa İttifaqı tərəfindən terror təşkilatı kimi tanınan Kürdüstan Fəhlə Partiyası (PKK) qüvvələrinin Türkiyə ərazisindən çıxarıldığını bəyan edib. Bu addım təşkilatın silahların təhvil verilməsi və sülh prosesi çərçivəsində atdığı ilk ciddi addımlardan biri kimi qiymətləndirilir.
Mövzu ilə bağlı politoloq Azad Məsiyev “İnformator.az”a bildirib ki, Türkiyə müasir dövrdə demokratik hüquq prinsiplərinə əsaslanan bir dövlətdir və cəmiyyətində etnik ayrı-seçkiliyə yol verilmir:
“Türkiyədə vətəndaşlar arasında etnik vəya dini əsaslı ayrı-seçkilik prinsipi qəbul olunmur. Ölkənin siyasi və iqtisadi sahələrində kürdlər, türklər və digər etnik qruplar mövcuddur və qanun qarşısında bərabər hüquqlara malikdirlər. Hər bir vətəndaş Türkiyənin inkişafı və quruculuğu prosesinə öz töhfəsini verir. Eyni zamanda, Türkiyənin regional gücdən daha geniş qlobal nüfuza malik olmasını arzulamayan xarici aktorlar mövcuddur. Bu aktorlar bəzi xaricdə yerləşən separatçı qruplara təsir göstərərək onların daxili və xarici siyasətə təzyiq vasitəsinə çevrilməsinə səbəb ola bilərlər. Bu kontekstdə PKK-nın terror fəaliyyəti həm daxili sabitliyə, həm də ölkənin xarici siyasət prioritetlərinə mənfi təsir göstərib. Türkiyə müvafiq təhlükəsizlik qurumları vasitəsilə terrorizmlə effektiv və ardıcıl mübarizə aparır və ölkədaxili terrorizmin məhdudlaşdırılması istiqamətində nəticələr əldə edib. Bu proses göstərir ki, bəzi xarici aktorlar Türkiyə ilə ‘güc dili’ ilə davranmağın mənasız olduğunu dərk etməlidirlər. Ümumilikdə, terrorizmə qarşı mübarizədə regional və qlobal əməkdaşlıq vacibdir. Türkiyə parlamentində müxtəlif etnik mənşəli siyasətçilər təmsil olunur və ölkənin həm iqtisadi, həm də siyasi potensialı güclənməkdədir. ‘Turan’ istiqamətli regional əməkdaşlıqların Türkiyənin qlobal nüfuzunu artırmaq potensialı var. Eyni zamanda, bəzi Avropa dövriyyələri ilə bağlı tənqidi yanaşmalar mövcuddur; bu fikirlərin müəllifi hesab edir ki, Avropa məkanında formalaşan siyasi və mədəni təsirlər bəzən Türkiyənin regional roluna maneçilik törətmək məqsədi daşıya bilər”.
Fatimə Hüseynli
