Qatar Airways, cəsədin idarə edilməsini müdafiə edib
Qatar Airways bildirib ki, daxili araşdırma nəticəsində ekipaj üzvlərinin uçuş zamanı dünyasını dəyişən qadının cəsədini "tez, uyğun və peşəkar şəkildə" idarə etdikləri müəyyən edilib.
Bu, hadisə zamanı travma keçirdiklərini bildirən avstraliyalı cütlüyün, Melburn-Doha reysi ilə bağlı Avstraliyanın Channel Nine kanalına danışmasından sonra baş verib.
Qatar Airways əvvəlki açıqlamasında bu hadisənin “hər hansı bir narahatlıq və ya stress yaratdığı üçün” üzr istəyib. Hadisə, təyyarələrdə ölüm halları ilə bağlı prosedurlar barədə müzakirələrə səbəb olub.
Mitçell Ring və Cennifer Kolin Venesiyaya tətil üçün gedərkən, ekipaj üzvlərinin dünyasını dəyişən qadının cəsədini, yorğanlarla örtülü şəkildə, 14 saatlıq uçuşun son dörd saatında cənab Ringin yanına qoyduqlarını bildiriblər.
Ringin sözlərinə görə, ekipaj üzvləri qadının bədənini salonun dar dəhlizindən biznes-klass bölməsinə daşımaqda çətinlik çəkiblər, çünki "o, kifayət qədər iri xanım idi". Daha sonra ekipaj üzvləri cənab Ringdən yerini dəyişməsini istəyərək qadının cəsədini onun oturduğu yerə yerləşdiriblər.
Ms Kolin, dəhlizin o biri tərəfindəki başqa bir sərnişin tərəfindən yanında oturmağa dəvət edilsə də, cənab Ring bildirib ki, təyyarə heyəti onu başqa yerə keçirməyi təklif etməyib, baxmayaraq ki, ətrafda boş yerlər var idi.
Qatar Airways cümə günü verdiyi açıqlamada, ekipajın bu hadisəni idarə etmə tərzinin "təlim və sənaye standartlarına uyğun" olduğunu vurğulayıb.
"Bəzi sərnişinlər başqa yerlərə yerləşdirilib və ekipaj üzvlərindən biri uçuşun sonuna qədər dünyasını dəyişmiş sərnişinin yanında oturub," - deyə şirkət bildirib.
“Hava nəqliyyatında gözlənilməz ölümlərin baş verməsi qaçılmaz bir reallıqdır və ekipajımız bu cür vəziyyətlərdə mümkün qədər çox hörmət və ləyaqətlə davranmaq üçün yüksək səviyyədə təlim keçib".
Hava yolu şirkəti həmçinin dünyasını dəyişən şəxsin ailəsinə və hadisədən "birbaşa təsirlənən" digər sərnişinlərə dəstək və kompensasiya təklif etdiyini bildirib.
BBC
Nuray Qurbanlı
