Qəzzada yardım növbəsində olan fələstinlilər hədəfə alınıb

Qəzzadakı tibbi mənbələrin məlumatına görə, İsrail qüvvələrinin və pilotsuz təyyarələrinin son hücumlarında 80-dən çox fələstinli həlak olub. Ölümlərin əksəriyyəti yardım mərkəzlərinin yaxınlığında baş verib. Təkcə Rəfah şəhərində 27 nəfər yardıma yaxınlaşarkən güllələnib.

2023-cü il oktyabrın 7-dən bəri bölgədə ölənlərin ümumi sayı 56 minə, yaralananların sayı isə 131 mini ötüb. Humanitar təşkilatlar, xüsusilə UNRWA və GHF, yardım növbələrində baş verən bu hadisələri "ölüm tələsi" adlandırıb.

Ən qanlı hadisələrdən biri Salah əl-Din küçəsində baş verib: azı 25 nəfər ölüb, 140-dan çox insan yaralanıb. Yaralılardan çoxunun vəziyyəti ağırdır. Şahidlərin sözlərinə görə, İsrail tankları və PUA-lar yardım növbəsində olan insanlara xəbərdarlıq etmədən atəş açıblar. İsrail ordusu hadisə ilə bağlı araşdırma apardığını açıqlayıb.

Mənbə: CNN
Türkan Kərimli