Ərdoğan, Putin ilə telefon danışığı aparıb

Prezident Administrasiyasının yaydığı məlumata görə, liderlər telefon danışığında Türkiyə ilə Rusiya arasında ikitərəfli münasibətləri, eləcə də regional və qlobal məsələləri müzakirə ediblər.

Prezident Ərdoğan görüş zamanı Türkiyənin İrana qarşı hücumları dəstəkləmədiyini, eyni zamanda İranın bölgə ölkələrinə cavab addımlarını da uyğun hesab etmədiyini bildirib. O, müharibənin daha da nəzarətdən çıxmaması üçün bütün tərəflərlə sülh və sabitliyə yönəlmiş təmasların davam etdirildiyini vurğulayıb.

Ərdoğan həmçinin Benjamin Netanyahu hökumətinin bölgədə apardığı aqressiv siyasətin qarşısının alınmasının vacibliyini qeyd edib. İsrailin Qüdsün statusunu dəyişdirməyə yönəlmiş addımlarına yol verilməyəcəyini bildirib.

Prezident Ərdoğan Suriyadakı son vəziyyəti yaxından izlədiyini, bu ölkədə sabitliyi gücləndirəcək hər addımın Türkiyə və Rusiyanın ortaq maraqlarına xidmət etdiyini və əldə olunmuş nailiyyətlərin riskə atılmamasının önəmli olduğunu vurğulayıb.

O, həmçinin Rusiya-Ukrayna müharibəsinin sülhlə nəticələnməsi üçün Türkiyənin səylərinin pozulmamasının vacibliyini qeyd edib. Ərdoğan həmçinin Türkiyənin bütün tərəflərə gərginliyi artıracaq addımlardan çəkinməyi tövsiyə etdiyini bildirib. Qara dənizdə mülki gəmilərə hücumların sabitliyə zərər verdiyini və İranla bağlı münaqişənin Rusiya-Ukrayna böhranında yeni qarşıdurma sahələri yaratmamalı olduğunu da deyib.

TRT HABER

Reyhan Quliyeva