Rusiyadan Ukraynaya raket hücumu: 8 ölü

Rusiya ordusunun Ukraynanın şərqindəki Liman şəhərinə raket zərbəsi endirməsi nəticəsində 8 nəfər həlak olub.

İnformator.az CNN-ə istinadən xəbər verir ki, Rusiya Ukraynanın şərqindəki Donetsk vilayətinin Liman şəhərinə raket zərbəsi endirib. Ukrayna Daxili İşlər Nazirliyindən verilən açıqlamada, hücum nəticəsində 8 nəfərin həyatını itirdiyi, 13 nəfərin yaralandığı bildirilir. Açıqlamada Rusiya ordusunun həyata keçirdiyi hücumlarda bir iqamətgah, mətbəə binası və 3 avtomobilin yandırıldığı da bildirilib. Bölgəyə sağlamlıq qrupları və axtarış-xilasetmə qrupları göndərilərkən, yaralılar xəstəxanaya aparılıb.

Donetsk qubernatoru Pavlo Kyrylenko da sosial media hesabından açıqlama verib: “Ruslar səhər saat 10:00 radələrində şəhəri çoxlu sayda reaktiv yaylım atəşi ilə vurdular. Yaşayış və iş yerlərinə ciddi ziyan dəyib”.

Qeyd edək ki, əhəmiyyətli dəmiryol mərkəzlərindən biri olan Lyman şəhəri işğalın əvvəlində rus ordusu tərəfindən ələ keçirilib, şəhər isə ötən ilin oktyabrında Ukrayna ordusu tərəfindən geri alınıb.