SpaceX-in Starship kosmik gəmisi ikinci dəfə partlayıb

SpaceX-in Starship kosmik gəmisi – indiyə qədər qurulmuş ən güclü buraxılış sisteminin yuxarı hissəsi – cümə axşamı günü səkkizinci sınaq uçuşu zamanı partlayıb. Bu, hava nəqliyyatına təsir etməklə yanaşı, ilin ikinci ardıcıl uğursuzluğu olub.

İnsansız Starship missiyası SpaceX-in Cənubi Texasdakı Starbase obyektindən havaya qalxıb. Kosmik gəmi 71 metr hündürlüyündə Super Heavy raket gücləndiricisinin üzərində yüksəlib.

Təxminən 2,5 dəqiqə davam edən yanmadan sonra Super Heavy gücləndiricisi planlaşdırıldığı kimi Starship-in yuxarı mərhələsindən ayrılıb və Texasın Braunsvil yaxınlığında yerləşən SpaceX buraxılış qülləsinin "Mechazilla" adlı "çubuq" qolları arasında uğurlu eniş edib. Bu, SpaceX-in gücləndiricini çubuqlarla üçüncü dəfə uğurla tutması olub.

Lakin uçuşdan 10 dəqiqə keçməmiş Starship-in kosmosa doğru davam edən hissəsində problemlər yaşanıb. Canlı yayım zamanı nəqliyyat vasitəsinin bir neçə mühərrikinin sönməsi açıq şəkildə göründü, gəmi idarəetməni itirərək fırlanmağa başlayıb və nəhayət, SpaceX onunla əlaqəni itirib.

CNN

Nuray Qurbanlı