ABŞ Prezidenti Donald Tramp bazar ertəsi bildirib ki, ABŞ-də süni intellekt şirkətlərini tənzimləmək və məsuliyyətə cəlb etmək üçün artıq kifayət qədər nəzarət mexanizmləri mövcuddur. Bununla da o, həftəsonu sənaye rəhbərləri tərəfindən səsləndirilən süni intellektdən sui-istifadə ilə bağlı narahatlıqları əhəmiyyətsiz göstərməyə çalışıb.

Tramp “Truth Social” platformasında yazıb: “Süni intellektin ehtiyac duyduğu yeganə nəzarət güclü və ağıllı prezidentdir və ABŞ-də belə prezident var!” O əlavə edib ki, süni intellektin inkişafına şübhə ilə yanaşılması Çinin xeyrinə ola bilər.

Tramp həmçinin bildirib: “Bu şirkətlər üzərində onsuz da böyük cinayət və tənzimləyici səlahiyyətlərimiz var! Süni intellektə və məlumat mərkəzlərinə qarşı xəstə bir sui-qəsd gedir və bundan yalnız Çin məmnundur".

Süni intellektin mümkün zərərləri ilə bağlı narahatlıqlar ötən həftə Anthropic şirkətinin tədqiqatçısı Ceykob Koxonun istefa verdiyini açıqlamasından sonra artıb. O bildirib ki, “süni intellekt yaradan insanlar onun bu onilliyin sonuna qədər hamımızı öldürə biləcəyinə ciddi şəkildə inanırlar".

Süni intellektlə əlaqəli şirkətlərin səhmləri bazar ertəsi bütün dünyada kəskin şəkildə ucuzlaşıb. Buna səbəb sənayenin ən böyük şirkətlərinin rəhbərlərinin texnologiyanın inkişaf tempinin yavaşladılmasına çağırış etməsi olub.

Anthropic şirkətinin baş direktoru Dario Amodei şənbə günü yayımladığı məqalədə ABŞ hökumətinin ən qabaqcıl süni intellekt sistemlərinin, yəni “frontier” modellərinin müstəqil şəkildə yoxlanılmasını tələb edən qaydalar hazırlamalı olduğunu bildirib.

O, süni intellektin inkişafını yavaşlatmaq və onun risklərini idarə etmək üçün daha çox vaxt yaratmaq məqsədi daşıyan üçmərhələli plan təqdim edib. Təklifə xAI şirkətinin rəhbəri İlon Mask və OpenAI-nin baş direktoru Sem Altman da daxil olmaqla, bir sıra böyük süni intellekt şirkətlərinin rəhbərləri dərhal dəstək veriblər.

Səkinəbəyim Cəfərova
Reuters