Trampdan Rusiyanın Ukraynaya hücumlarına reaksiya: Bu hərəkətlərdən məmnun deyiləm

ABŞ-ın sabiq prezidenti Donald Tramp, Rusiyanın Ukraynaya qarşı həyata keçirdiyi hücumlarla bağlı jurnalistlərə açıqlama verib. Tramp, Rusiya prezidenti Vladimir Putinin bu hərəkətlərindən məmnun olmadığını bildirib.

Amerikanın “The Hill” qəzetinin xəbərinə görə, Tramp Morristown Hava Limanında “Air Force One” təyyarəsinə minməzdən əvvəl jurnalistlərin suallarını cavablandırıb. O, Rusiyanın Ukraynaya son hücumlarına toxunaraq deyib:
“Putinin etdiklərindən məmnun deyiləm. Bir çox insanı öldürür və Putinə nə olub, bilmirəm.”

Rusiyanın bu hücumları qarşısında təəccübləndiyini bildirən Tramp əlavə edib:

“Onu (Putini) uzun müddətdir tanıyıram. Həmişə münasibətlərimiz yaxşı olub, amma indi şəhərlərə raket atır, insanları öldürür və bu, mənim xoşuma gəlmir. Danışıqların ortasındayıq, o isə Kiyev və digər şəhərlərə raket atır. Bundan heç də məmnun deyiləm.”

12 nəfər həlak olub.

Ukraynanın daxili işlər naziri İhor Klimenko bildirib ki, Rusiyanın dünən raket və pilotsuz uçuş aparatları (PUA) ilə həyata keçirdiyi hücumlar nəticəsində 12 nəfər həyatını itirib, 60-dan çox insan yaralanıb.

Ukrayna prezidenti Volodimir Zelenski yazılı açıqlamasında bildirib ki, Rusiya ölkəsinə təxminən 70 raket və 300-ə yaxın PUA ilə hücum edib.

Müttəfiq ölkələri Rusiyaya təzyiq göstərməyə çağıran Zelenski əlavə edib:

“Amerikanın susqunluğu və dünyanın digər hissələrinin səssizliyi, (Rusiya prezidenti Vladimir) Putini yalnız daha da cəsarətləndirir.”

Mənbə: A HABER
Solmaz Muradova