İsrailin Qərbi Şəriyadakı qaçqın düşərgələrindən köçürülən fələstinlilər geri dönüş ümidi axtarır

İsrailin işğalı altındakı Qərbi Şəriyanın şimalındakı qaçqın düşərgələrindən zorla çıxarılan fələstinlilər aylardır davam edən hücumlar səbəbindən qeyri-müəyyənlik və çətin şəraitdə həyat mübarizəsi aparırlar. Onlar uzun illər yaşadıqları evlərə geri dönmək ümidi ilə yaşayırlar.

AA müxbirinə danışan fələstinlilər ailələrindən və evlərindən zorla ayrıldıqlarını, illərlə yaşadıqları düşərgələrdən çıxarıldıqdan sonra həyatlarını çətinliklə davam etdirdiklərini bildiriblər. Onların sözlərinə görə, düşərgə xaricində yeni həyata uyğunlaşmaq demək olar ki, mümkünsüz olub. İsrail 2025-ci ilin 21 yanvarından etibarən Qərbi Şəriyanın şimal bölgəsindəki hücumlarını davam etdirir. Əvvəlcə Cenin Qaçqın Düşərgəsini hədəf alan hücumlar sonradan Tulkarim və Nur Şəms düşərgələrinə də yayılıb. Bu hücumlar nəticəsində yüzlərlə ev dağıdılıb, on minlərlə insan məcburi şəkildə köçkünə çevrilib.

Hücumlar minlərlə evin dağılmasına, düşərgələrin coğrafi və demoqrafik strukturunun dəyişdirilməsinə səbəb olub. Yeni yolların açılması və məhəllələrin sistematik şəkildə dağıdılması bölgənin mənzərəsini tamamilə dəyişdirib. Bu hücumlar 2023-cü il 8 oktyabrda başlayaraq iki il ərzində Qəzzəyə yönəlmiş soyqırım xarakterli hücumlarla paralel şəkildə həyata keçirilib. Qərbi Şəriyada aparılan əməliyyatlar zamanı azı 1069 fələstinli həlak olub, 10 min nəfər yaralanıb. Onların arasında 1600-ü uşaq olmaqla 20 mindən çox insan həbs edilib. Tulkarim qubernatoru Abdullah Kamil oktyabr ayının sonunda verdiyi açıqlamada, İsrail hakimiyyətinin Qərbi Şəriyanın şimalındakı qaçqın düşərgələrinə hücumları 2026-cı ilin yanvar ayının sonuna qədər uzatdığını bildirib. Onun sözlərinə görə, İsrail ordusunun bu qərarı bölgədə gərginliyin davam edəcəyinə işarədir. Kamil qeyd edib ki, bu hücumların məqsədi fələstinliləri daha geniş ərazilərdən çıxarmaq və bölgənin demoqrafik strukturunu dəyişdirməkdir.

TRT Haber 

Aysun Vəliyeva