İstənilən Avropa ölkəsinin Ukrayna münaqişəsində iştirakı dünya müharibəsinə səbəb olacaq - Szijarto

Macarıstanın xarici işlər naziri Peter Szijarto bildirib ki, ən azı bir Avropa ölkəsinin Ukraynadakı münaqişəyə cəlb olunması Rusiya ilə birbaşa münaqişə demək olacaq və bu, dünya müharibəsi ilə nəticələnəcək.

O, Avropanın müharibə səbəbindən fövqəladə vəziyyət yaşadığını bəyan edib. "Əgər heç olmasa bir Avropa ölkəsi bu müharibəyə qarışsa, dünya müharibəsi təhlükəsi yaradacaq, çünki o, mütləq NATO ölkəsi olacaq. Əgər NATO ölkəsi Rusiya ilə birbaşa münaqişəyə girərsə, yeni dünya müharibəsi baş verəcək. Bu, qaçılmaz bir nəticədir”, - deyə o bildirib.

Macarıstanın baş diplomatının fikrincə, Avropa siyasi liderləri “hərbi psixozdan əziyyət çəkirlər” və onların ehtiyatsız qərarları silahlı münaqişənin genişlənməsi riskini artırır. İyunun 9-da Avropa Parlamentinə seçkilər ərəfəsində hakim Fidesz - Macarıstan Vətəndaş Alyansı Partiyasının təşkil etdiyi bəyanatda o, "Ukraynaya Avropa qoşunlarının yerləşdirilməsi və hətta nüvə silahı ilə bağlı olduqca sərsəm bəyanatlar eşitmişik",-dedi. 

O, macar seçicilərini dərhal atəşkəs və Ukrayna münaqişəsinin həlli üçün danışıqlara başlamağı müdafiə edən siyasi partiyaları dəstəkləməyə çağırıb. “Müharibəni müdafiə edən qüvvələr öz mövqelərini qoruyub saxlasalar, Ukraynada hərbi vəziyyət eyni qalacaq”, - o xəbərdarlıq edib.

O xatırladıb ki, Avropa İttifaqı və NATO Ukraynaya beş illik hərbi yardım planı üzərində işləyir və müharibə səylərinə on milyardlarla avro sərmayə qoymaq istəyir. Bunun qarşısını almaq üçün Avropa Parlamentinə sülh hərəkatının nümayəndələrini göndərməliyik”, - Szijarto bildirib. 

Mənbə: TASS.com

Tərcümə etdi: Gülnisə Əfkari