“Milli-Mənəvi Dəyərlərimizin İzində” layihəsinə start verildi

Bölmə: Sosial › ,
Tarix: 10:04 10.06.2025

2025-ci il iyunun 1-dən etibarən “Milli-Mənəvi Dəyərlərimizin İzində” adlı sosial yönümlü layihəyə rəsmi şəkildə start verilib. Layihə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “Ahıllara və Tənhalara” Dəstək İctimai Birliyi tərəfindən həyata keçirilir.

Layihənin əsas məqsədi milli-mənəvi dəyərlərimizin qorunması və təbliğinə töhfə verməklə yanaşı, ahıl və yaşlı nəslin cəmiyyət həyatında fəallığının artırılmasını, onların sosial təcriddən uzaq, mənalı və sağlam bir həyat sürməsini təmin etməkdir. Bu çərçivədə ahıl insanların asudə vaxtının daha səmərəli təşkili, onların mənəvi dünyasının zənginləşdirilməsi və ictimai həyata fəal şəkildə cəlb olunması hədəflənir.

Layihə çərçivəsində müxtəlif sosial və mədəni fəaliyyətlər – o cümlədən şəhərdaxili və regionlara təşkil olunacaq ekskursiyalar, sağlamlıq, milli oyunlar, yarışlar, həmçinin ahılların bilik və təcrübələrini bölüşə biləcəyi dəyirmi masalar və tematik görüşlər nəzərdə tutulur. Bu tədbirlər vasitəsilə yaşlı insanların fiziki və psixoloji sağlamlığının dəstəklənməsi, onların özlərini cəmiyyətin dəyərli üzvü kimi hiss etmələri təmin ediləcək.

Bundan əlavə, layihə ahılların ömür boyu topladıqları milli-mənəvi bilik və təcrübələri gənc nəslə ötürmək imkanlarını da artıracaq. Ahılların iştirak edəcəyi tədbirlərdə onların keçmişə dair xatirələri, milli adət-ənənələr, ailə dəyərləri və həyat fəlsəfəsi gənclərlə bölüşüləcək, bu da mədəni irsin canlı şəkildə nəsildən-nəslə ötürülməsinə şərait yaradacaq.

Layihə, eyni zamanda, ahıl və tənhaların sosiallaşma imkanlarını genişləndirəcək, onların yeni insanlarla tanış olub dostluq münasibətləri qurmasına zəmin yaradacaq. Bu da onların özlərini daha dəyərli və faydalı hiss etmələrinə, həyat keyfiyyətlərinin yüksəlməsinə və ümumilikdə milli kimlik hissinin möhkəmlənməsinə töhfə verəcək.

“Milli-Mənəvi Dəyərlərimizin İzində” layihəsi 2025-ci il avqustun 31-dək davam edəcək. Bu müddət ərzində həyata keçiriləcək tədbirlərin hər biri yaşlı nəslə hörmətin və onların cəmiyyət üçün nə qədər önəmli olduğunu bir daha vurğulayan bir missiya daşıyır. Layihə həmçinin sosial siyasətdə ahılların inteqrasiyasına yönəlik davamlı fəaliyyətlər üçün nümunəvi model kimi çıxış edə bilər.