“ABŞ Ukrayna danışıqlarında vasitəçiliyə hazır olduğunu açıqlayıb”

ABŞ dövlət katibi Marko Rubio bildirib ki, hazırda Moskva, Vaşinqton və Kiyev arasında Ukrayna münaqişəsinin həlli ilə bağlı danışıqlar aparılmır.

 Bununla belə, ABŞ bu diplomatik prosesdə vasitəçi rolunu davam etdirməyə hazırdır.
O, İsveçdə NATO xarici işlər nazirlərinin görüşü çərçivəsində jurnalistlərə açıqlamasında deyib:
“Hazırda belə danışıqlar keçirilmir, lakin ümid edirik ki, bu dəyişəcək. Təəssüf ki, əvvəlki danışıqlar nəticəsiz oldu. Bununla belə, biz bu rolu oynamağa davam etməyə hazırıq”.

Rubionun sözlərinə görə, əgər bu prosesi başqa bir tərəf idarə etmək istəyirsə, buna etiraz yoxdur. Lakin o vurğulayıb ki, hazırda dünyada bunu həyata keçirə biləcək başqa bir tərəf görünmür.
ABŞ dövlət katibi həmçinin qeyd edib ki, Vaşinqton nəticəsiz görüşlərin sonsuz şəkildə davam etməsində maraqlı deyil.
Marko Rubio Ukraynadakı münaqişənin hərbi yolla həllinin mümkün olmadığını da bildirib:
“Bu münaqişə tərəflərdən birinin ənənəvi mənada hərbi qələbəsi ilə başa çatmayacaq”.

TASS
Nuray Əliyeva