Braziliya öz ixracatçılarına kömək edəcək

Braziliya Prezidenti ABŞ-nin tətbiq etdiyi 50 faizlik tariflərdən zərər çəkmiş ixracatçılar üçün 5,5 milyard dollar məbləğində kredit ayıracağını açıqlayıb.

Çərşənbə günü Braziliya, ABŞ Prezidenti Donald Trampın bəzi növ Braziliya ixracına tətbiq etdiyi 50 faizlik tariflərdən zərər çəkmiş yerli şirkətləri dəstəkləmək üçün plan təqdim edib. Sənəd prezident sarayı Planaltuda keçirilən mərasimdə açıqlanıb.

Planın əsas hissəsini tariflərin artırılmasından təsirlənən şirkət və sahələri dəstəkləmək üçün hökumət tərəfindən açılan 5,5 milyard dollarlıq kredit xətti təşkil edir. Yerli mediaya müsahibəsində Prezident Luis Inasiu Lula da Silva bunun ixracatçılar üçün başlanğıc yardım paketi olduğunu dəqiqləşdirib. O, həmçinin dövlət satınalmaları vasitəsilə də onları dəstəkləyəcəyinə söz verib. Braziliya, Trampın yeni tariflərindən ən çox zərər çəkən ölkələr arasında yer alıb. ABŞ-yə Braziliya ixracına tətbiq olunan 50 faizlik tarif 1 avqustdan qüvvədədir. Ağ Evin sahibi Braziliyanı “Amerika texnologiya şirkətlərinə hücum etməkdə” və istintaq altında olan sabiq prezident Jair Bolsonaroya qarşı “cadugər ovunda” ittiham edib.

Euronews
Fatimə Heydərova