Çin 6G texnologiyasında irəliləyiş əldə edib

Çin, 6G şəbəkələrinin standartlarını və sənaye ekosistemini formalaşdırmaq üçün səylərini sürətləndirir, baxmayaraq ki, kommersiya istifadəsi hələ bir neçə il uzaqdadır.

Rəsmi şəxslərin bildirdiyinə görə, ilkin sınaq mərhələsi gələcək 6G sistemlərinin əsasını təşkil edəcək texniki imkanların yoxlanmasına yönəlib. Bunlara ultra-aşağı gecikməli bağlantılar, yüksək tezlikli spektrdən istifadə, kosmos-hava-yer inteqrasiya bağlantısı və gücləndirilmiş təhlükəsizlik çərçivələri daxildir. Tədqiqatçılar həmçinin avtonom istehsaldan real vaxtda holografik ünsiyyətə qədər erkən tətbiqləri araşdırıblar.

Layihə rəhbərləri sınaq nəticələrinin bir neçə sahədə “əhəmiyyətli irəliləyiş” göstərdiyini və növbəti sistem səviyyəli və yüksək tutumlu təcrübələr üçün zəmin yaratdığını bildiriblər. Çin 6G üzrə milli tədqiqat təşəbbüsünü 2019-cu ildə başladıb və burada Huawei, ZTE, China Mobile kimi iri dövlət dəstəklı institutlar, universitetlər və telekom şirkətləri inkişafın koordinasiyasına cəlb olunub.

Qlobal 6G rəqabəti sürətlənir, çünki hökumətlər və sənaye sektorları bu şəbəkələrdə üstünlük qazanmaq üçün çalışır. Ekspertlər kommersiya istifadəsinin təxminən 2030-cu ildə baş verəcəyini gözləyir, amma erkən standartların hazırlanması gələcək bazarları və texnologiyaları formalaşdırmaq baxımından həlledici hesab olunur.

Sənaye və İnformasiya Texnologiyaları Nazirliyi bildirib ki, sınaqların ikinci mərhələsi sənayelərarası ssenariləri əhatə edəcək və 6G standartları üzrə davam edən beynəlxalq müzakirələrə töhfə verəcək. Çin həmçinin qlobal tədqiqat tərəfdaşlıqlarına daha sıx inteqrasiya olunmaqla növbəti telekommunikasiya innovasiyasında təsirli oyunçu kimi özünü təqdim etməyi hədəfləyir.

ANEWZ
Güllər Gülhüseynova