Əfqanıstan və Qazaxıstan ərzaq idxalı sazişi imzalayıb

Əfqanıstan və Qazaxıstan 2 milyon dollarlıq ərzaq idxalı müqaviləsi imzalayıb. Saziş Əfqanıstanın Sənaye və Ticarət naziri Nurəddin Azizi və Qazaxıstanın Kabildəki səfiri Qaziz Akbasovun iştirakı ilə keçirilən görüşdə yekunlaşdırılıb.

Razılaşmaya əsasən, Qazaxıstandan təxminən 600 min ton un, buğda, kətan və soya paxlası Əfqanıstana idxal ediləcək. Dünyanın ilk on böyük buğda ixracatçısı sırasında yer alan Qazaxıstan üçün bu addım mühüm ticarət əməkdaşlığına yol açır.

Nazir Azizi bildirib ki, məqsəd ikitərəfli ticarət dövriyyəsini daha yüksək həddə çatdırmaqdır:

“Bizim hədəfimiz Qazaxıstanla ticarəti 3 milyard dollardan çox səviyyəyə qaldırmaqdır”.

Bu razılaşma ötən ay Qazaxıstan rəsmilərinin Kabildə keçirdiyi mühüm səfərin davamı kimi qiymətləndirilir. Həmin səfər çərçivəsində kənd təsərrüfatı, nəqliyyat və enerji əməkdaşlığı sahələrində bir sıra memorandumlar imzalanıb.

Əfqanıstan üçün bu cür razılaşmalar həyati əhəmiyyət daşıyır. BMT-nin Dünya Ərzaq Proqramı (WFP) xəbərdarlıq edir ki, ölkədə 15 milyondan çox insan kəskin ərzaq çatışmazlığı ilə üz-üzədir. Xarici İşlər Nazirliyinin yüksək rütbəli rəsmisi qeyd edib:

“Əfqanıstan öz tələbatını ödəyəcək qədər buğda istehsal etmir. İdxaldan asılılıq qaçılmazdır və Qazaxıstan ən etibarlı təchizatçı ölkədir”.

Səfir Akbasov isə vurğulayıb ki, Qazaxıstan Əfqanıstanla uzunmüddətli əməkdaşlığa sadiqdir:

“Qazaxıstan ərzaq ixracı ilə Əfqanıstanı dəstəkləməyə davam edəcək, təchizat zəncirlərində sabitlik yaradacaq və regional əlaqələri gücləndirəcək”.

Qazaxıstanın Ticarət Nazirliyinin məlumatına görə, 2024-cü ildə iki ölkə arasında ticarət dövriyyəsi təxminən 1,3 milyard dollara çatıb. Tərəflər bildiriblər ki, gələcəkdə enerji və tranzit dəhlizləri üzrə də yeni razılaşmalar imzalanaraq Əfqanıstanın Mərkəzi Asiyanın daha geniş ticarət şəbəkəsinə inteqrasiyası gücləndirilə bilər.

ANEWZ 

Güllər Gülhüseynova