İndoneziyada tələbələr yaradıcı etiraz aksiyası keçiriblər
Cümə günü günortadan sonra Cakartada – İndoneziya parlamenti qarşısında tələbələr “piknik etirazı” adlandırdıqları aksiya təşkil ediblər. Son bir həftə ərzində gərgin keçən mitinqlərdən fərqli olaraq, bu dəfə tədbir sakit və yaradıcı mühitdə baş tutub.
Aksiya çərçivəsində şeir səsləndirilib, kitab müzakirələri, nitqlər keçirilib. İştirakçılar saxlanılan aksiyaçıların azad edilməsini tələb edib və hərbi qüvvələrin mülki təhlükəsizlikdə rolunu müzakirə ediblər. Padjadjaran Universitetinin tələbə lideri Vinsent Tomas Kompas TV-yə çıxışında deyib:
“Biz bir yerdə piknik edirik, yaradıcılığımızı göstəririk. Sadəcə qışqırmaq əvəzinə, soyuqqanlı və innovativ şəkildə narazılığımızı ifadə edirik".
Jakarta polisinin nümayəndəsi Ade Ary Syam Indradi bildirib ki, tədbir zamanı təhlükəsizliyi təmin etmək üçün 1 371 polis və hərbi qulluqçu cəlb olunub. Kompasın məlumatına görə, Mərkəzi Yavada yerləşən Solo şəhərində də tələbələr ərzaq paylayıb, pulsuz tibbi müayinə aksiyası təşkil ediblər.
Son etirazlar ötən həftə parlament üzvlərinin mənzil xərcləri ilə bağlı narazılıqlar fonunda başlanıb. Mitinqlər bir mototaksi sürücüsünün polis maşını ilə toqquşma nəticəsində həyatını itirməsindən sonra daha da güclənib.
Cümə axşamı tələbə qrupları hökumət üzvləri ilə görüşərək təkliflərini təqdim ediblər. Daha əvvəl bəzi deputatlarla da danışıqlar aparılıb. Prezident Prabovo Subianto ilə birbaşa görüş tələbi isə hələ qəbul edilməyib.
Human Rights Watch-un məlumatına görə, son etirazlar zamanı 3 000-dən çox insan saxlanılıb, 10 nəfər ölüb, 1 000-dən çox şəxs xəsarət alıb. Rəsmilər tələbələrin son tələblərinə hələ rəsmi cavab verməyiblər, lakin aksiyalar dinc şəkildə davam edir və tələbə nümayəndələri ilə hökumət arasında müzakirələrin sürəcəyi gözlənilir.
ANEWZ
Güllər Gülhüseynova
