İspaniya, iki israilli nazirin ölkəyə girişini qadağan edib

İspaniya hökuməti, “Qəzzada soyqırım, insan haqları pozuntuları və müharibə cinayətlərində birbaşa iştirakı olan bütün şəxslərin İspaniya ərazisinə girişinin qadağan edilməsi” qərarı çərçivəsində İsrailin Milli Təhlükəsizlik naziri İtamar Ben-Qvir və Maliyyə naziri Betsalel Smotriçə ölkəyə giriş qadağası qoyub.

İspan hökuməti bu gün Nazirlər Kabinetində təsdiqləyərək qüvvəyə mindirdiyi, Qəzzadakı soyqırıma görə İsrailə qarşı qəbul edilən 9 maddəlik sanksiya paketi çərçivəsində iki israilli nazirin də ölkəyə girişini yasaqlayıb.

İspaniya Baş naziri Pedro Sançesin dünən elan etdiyi sanksiya paketindən sonra İsrail hökuməti cavab olaraq İspaniyanın Baş nazir müavini, Əmək və Sosial İqtisadiyyat naziri Yolanda Dias ilə Uşaq və Gənclər naziri Sira Reqonun ölkəyə girişinə qadağa qoyub.

Buna cavab olaraq İspaniya hökuməti də İsrailin Milli Təhlükəsizlik naziri Ben-Qvir və Maliyyə naziri Smotriçin ölkəyə girişini qadağan etmək qərarına gəlib.

İspaniya hökumətinin bu gün təsdiqlədiyi İsrailə qarşı sanksiyalar çərçivəsində qəbul edilən maddələrdən birində qeyd olunur: “Qəzzada soyqırım, insan haqları pozuntuları və müharibə cinayətlərində birbaşa iştirakı olan bütün şəxslərin İspaniya ərazisinə girişinə qadağa qoyulur”.

TRT XƏBƏR
Nuray Əliyev