"İspaniyapaniya səfirliyi Təl-Əvivdən çıxarılmalıdır. Fələstin bizi gözləyir"

İspaniya Baş nazirinin müavini, Əmək və Sosial İqtisadiyyat naziri Yolanda Dias, “İspaniya səfirliyi Təl-Əvivdən çıxarılmalıdır. Fələstin bizi gözləyir” şərhini verib.

Koalisiya hökumətinin kiçik ortağı olan Sumar ittifaqından Dias, ölkəsinin İsrailə qarşı sanksiyalarını elan etməsindən sonra Bluesky sosial şəbəkə platformasında mesaj yayımlayıb.

Dias mesajında, “İspaniya səfirliyi Təl-Əvivdən çıxarılmalıdır. Fələstin bizi gözləyir” ifadələrindən istifadə edib.

Baş nazir Pedro Sançesin Qəzzadakı soyqırımına görə İsrailə qarşı 9 maddəlik sanksiya qərarını açıqlamasına münasibət bildirən Dias, “Biz bunun üçün hökumətdəyik. Keçən həftə bunu tərəfdaşımıza (koalisiyanın böyük ortağı Sosialist Fəhlə Partiyasına) çatdırdıq. Ölkəmiz soyqırımı dayandırmaq üçün daha çox şey etməli idi” fikrini paylaşıb.

Dias, Fələstinə verdikləri dəstək və İsrailə sanksiya tətbiq olunması üçün hökumətlərə təzyiq göstərən vətəndaş cəmiyyəti təşkilatlarına da təşəkkür edib.

İspaniya Mədəniyyət naziri: İsrail beynəlxalq tədbirlərdən kənarlaşdırılmalıdır.

Sumar ittifaqından olan Mədəniyyət naziri Ernest Urtasun da İspaniya dövlət televiziyası RTVE-yə verdiyi müsahibədə hökumətin İsrailə qarşı sanksiya qərarlarını çox müsbət və güclü hesab etdiyini vurğulayıb.

Urtasun bildirib ki, İsraillə bütün münasibətlərin kəsilməsi və İspaniyanın Təl-Əviv səfiri Ana Salomon Peresin geri çağırılması da sanksiya paketinə daxil edilmək istənilib, lakin hökumətin böyük ortağı bunu qəbul etməyib.

İspaniya Mədəniyyət naziri həmçinin İsrailin “Eurovision” mahnı müsabiqəsi kimi bütün beynəlxalq tədbirlərdən kənarlaşdırılması gərəkdiyini söyləyib.

Baş nazir Sançes isə səhər verdiyi açıqlamada İsrailə qarşı silah embarqosunu hüquqi baxımdan möhkəmləndirən Kral fərmanının təsdiqlənməsi və Qəzza zolağında soyqırımı, insan haqları pozuntuları və müharibə cinayətlərində birbaşa iştirak edən bütün şəxslərin İspaniyaya girişinin qadağan olunması da daxil olmaqla İsrailə qarşı 9 maddəlik sanksiya qərarını elan edib.

Sançesin açıqlamalarından sonra İsrail hökuməti də İspaniya hökumətindən Baş nazirin müavini, Əmək və Sosial İqtisadiyyat naziri Yolanda Dias ilə (Fələstin əsilli) Gənclik və Uşaqlıq naziri Sira Reqonun ölkəyə girişinin qadağan edildiyini açıqlayıb.

TRT XƏBƏR

Eslanda Kulieva