Kaladze Tbilisi meri uğrunda seçkilərdə qalib gəlib

Tbilisi meri vəzifəsinə keçirilən bələdiyyə seçkilərində hakim "Gürcü Arzusu – Demokratik Gürcüstan" partiyasının namizədi Kaxa Kaladze səslərin 100 faizinin hesablanmasından sonra 71,621 % səs toplayıb.

"İnformator.az" xəbər verir ki, bu barədə Gürcüstan Mərkəzi Seçki Komissiyası məlumat yayıb.

İkinci yeri "Güclü Gürcüstan" və "Qaxariya Gürcüstan naminə" müxalifət partiyalarının namizədi İrakli Kupradze tutub - o, 12,275 % seçicinin dəstəyini qazanıb.

Üçlüyü "Qırçı" liberal partiyasının namizədi Yaqo Xviçiya tamamlayır - onun lehinə 7,624 % səs var.

Bülletenlərin 99 %-nin işlənməsi nəticəsində hakim partiya ümumilikdə 81,7 % səs toplayıb. İkinci yerdə "Güclü Gürcüstan" (6,7%), üçüncü yerdə isə "Qaxariya Gürcüstan naminə" (3,7%) qərarlaşıb.

Qeyd edək ki, oktyabrın 4-də ölkə üzrə bələdiyyə seçkiləri keçirilib. Seçkilərdə 64 bələdiyyədə merlər və bələdiyyə şuralarının deputatları müəyyən olunub.