Əliyev İsrail ilə Suriya arasında vasitəçilik etdiklərini açıqlayıb

Azərbaycan Prezidenti İlham Əliyev bildirib ki, ölkəmiz İsrail ilə Suriya arasında vasitəçilik edir və bununla Orta Şərqdə sülhə töhfə verməyi hədəfləyir.

Əliyev, Al Arabiya kanalına verdiyi müsahibədə ölkəsinin Suriyaya humanitar və enerji dəstəyi verdiyini bildirib.

O, Azərbaycan, Suriya, Türkiyə və Qətər arasında imzalanan dördtərəfli razılaşmaya istinad edərək qeyd edib ki, Azərbaycan qazı Türkiyə vasitəsilə Suriyaya çatdırılır. Əliyev əlavə edib:

“Hazırda 1,2 milyard kubmetr qazın tədarükü barədə razılığa gəldik, amma gələcəkdə bu həcm artırıla bilər”.

Əliyev Suriya ilə İsrail arasındakı münasibətlərə toxunaraq bildirib:

“Suriya və İsrail rəsmiləri arasındakı görüşlər bizim vasitəçiliyimizlə həyata keçirildi. Məqsədimiz bölgədə sülh və proqnozlaşdırıla bilən mühit yaratmaq idi. Əgər buna kiçik də olsa töhfəmiz olduysa, bundan məmnunuq”.

O, həmçinin Türkiyə-İsrail münasibətlərinə də diqqət çəkib və əvvəlki mərhələdə iki ölkə arasında normallaşmaya dəstək verdiklərini xatırladıb.

Əliyev əlavə edib:

“Türkiyə ilə İsrail arasındakı normallaşmanın ilk mərhələsində Azərbaycanın rolu hər iki tərəf tərəfindən yüksək qiymətləndirildi. Bu gün münasibətlər gərgin olsa da, bizdən tələb olarsa kömək etməyə hazırıq. Əgər belə tələb gəlməzsə, səssiz diplomatik səylərlə ortaq məxrəcə nail olunmasına dəstək verə bilərik”.

CNN TÜRK
Lalə Qurbanlı