Ermənistan və Türkiyə arasında dialoq və münasibətlərin normallaşdırılması prosesi sərhədin istənilən an açılması barədə qərar qəbul etməyə imkan verəcək qədər irəliləyib.

"İnformator.az" xəbər verir ki, bunu Ermənistanın xarici işlər naziri Ararat Mirzoyan İrəvanda BMT-nin Biomüxtəliflik üzrə Konvensiyasının Tərəflər Konfransının (COP17) sammiti çərçivəsində jurnalistlərə açıqlamasında bildirib.

“Biz, məsələn, bazar ertəsi və ya sabah yuxudan oyanıb Ermənistan-Türkiyə sərhədinin açıldığını görə bilərik”, – nazir qeyd edib.

Mirzoyanın sözlərinə görə, tərəflər arasında dialoq kifayət qədər intensivdir və münasibətlərin normallaşdırılması prosesi əhəmiyyətli dərəcədə irəliləyib. O bildirib ki, Ermənistan sərhədi sərnişin və yük daşımaları üçün açmağa hazırdır.

Nazir vurğulayıb ki, iki ölkə arasında münasibətlərin normallaşdırılması istiqamətində yekun qərar istənilən vaxt qəbul edilə bilər.