Qəzzada daha 13 nəfər aclıqdan həyatını itirib

İsrailin hücumları və blokadası səbəbindən aclıq yaşanan Qəzza zolağında son 24 saatda 3-ü uşaq olmaqla daha 13 nəfər aclıqdan həyatını itirib.

Qəzzadakı Fələstin Səhiyyə Nazirliyinin yazılı açıqlamasında aclıqdan həyatını itirənlərlə bağlı son məlumatlar paylaşılıb.

Açıqlamada bildirilib ki, son 24 saatda 3-ü uşaq olmaqla 13 fələstinli aclıq və qidalanma çatışmazlığı səbəbindən həyatını itirib.

Qeyd olunub ki, 7 oktyabr 2023-dən bəri Qəzza zolağında aclıqdan ölənlərin sayı 130-u uşaq olmaqla 361-ə yüksəlib.

Birləşmiş Millətlərin (BM) dəstəklədiyi **İnteqrə Olunmuş Qida Təhlükəsizliyi Faza Təsnifatı (IPC)**nın 22 avqust tarixli açıqlaması ilə Qəzzada qıtlıq elan olunandan bəri isə 12-si uşaq olmaqla 70 nəfərin aclıq və qidalanma çatışmazlığı səbəbindən öldüyü vurğulanıb.

TRT XƏBƏR
Lalə Qurbanlı