"Satılmır"

Fransanın xarici işlər naziri Jan-Noel Barrot ABŞ prezidenti Donald Trampın tez-tez nəzarəti ələ keçirmək istədiyi Qrenlandiyanın “satış üçün olmadığını” təkrarlayıb.

Fransanın xarici işlər naziri Jan-Noel Barrot ABŞ mərkəzli X şirkətinin sosial media platformasından verdiyi açıqlamada Qrenlandiyaya rəsmi səfəri dəyərləndirib.

“Qrenlandiya Avropa ərazisidir” deyən Barrot, Fransanın bu mövzuda mövqeyinin “aydın” olduğunu və Qrenlandiyanın “satılmadığını” bildirib.

"2026-cı ilin əvvəlində Fransa Qrenlandiyada konsulluq açan ilk Avropa İttifaqı ölkəsi olacaq. Əməkdaşlığımızı gücləndirmək üçün tərəfdaşlar arasında dialoq komitəsi yaradılacaq", - Barrot deyib.

Qrenlandiya və Danimarkanın "tək olmadığını" vurğulayan Barrot, ada ilə həmrəylik mesajı verib.

TRAMPIN QRENLANDİYA HAQQINDA BƏYANATLARI

Seçildikdən və vəzifəyə gəldikdən sonra Tramp dəfələrlə Qrenlandiyanın onun ölkəsinin nəzarəti altında olması ilə bağlı ritorikasını təkrar edərək, adaya sahiblik və nəzarətin “mütləq zərurət” olduğunu müdafiə edib.

Mart ayında Konqresə müraciət edən Tramp, "Qrenlandiya milli təhlükəsizlik və hətta qlobal təhlükəsizlik üçün kritik əhəmiyyətə malikdir. Biz bunu təmin etmək üçün bütün tərəflərlə işləyirik. Bu və ya digər şəkildə bunu əldə edəcəyik" deyib.

ABŞ prezidenti iddia edib ki, Amerikanın Qrenlandiyaya sahib olması “azad dünyanı müdafiə etmək” üçün zəruridir.

Trampın sözləri bir çox qrupların, xüsusən də Qrenlandiya rəsmilərinin qəzəbinə səbəb olub.

Qrenlandiyanın o zamankı baş naziri Mute Bourup Egede, "Qrenlandiya Qrenlandiya xalqına məxsusdur. Biz satılmamışıq və heç vaxt da olmayacaq. Uzun müddətdir davam edən azadlıq mübarizəmizi itirməyəcəyik" deyib.

Farer adaları və Danimarka Krallığının iki muxtar bölgəsindən biri olan Qrenlandiya, bağlı olduğu Danimarkadan 2900 kilometr məsafədə yerləşir.

Ntv.comtr
Samirə Allahverdizadə