Tesla 29 milyard dollarlıq səhmlər ayırıb

Tesla şirkəti icraçı direktor İlon Mask-a 29 milyard dollar dəyərində səhmlər verməyi planlaşdırır. Şirkət bu qərarı “xoş niyyət jesti” adlandıraraq, daha daimi ödəniş planının 6 noyabrda səhmdarların səsverməsinə çıxarılacağını bildirib.

Hal-hazırda Tesla-nın təxminən 13%-nə sahib olan Mask bu səhmləri yalnız 2027-ci ilə qədər əsas rəhbər vəzifəsində qalacağı təqdirdə əldə edə biləcək. Bundan əlavə, səhmlər beş il müddətinə saxlanılmalıdır — yalnız vergi ödənişləri və hər səhm üçün 23.34 dollar satınalma qiyməti istisna təşkil edir. Bu qiymət 2018-ci ildəki mükafat planının şərtləri ilə eynidir.

Tesla-nın xüsusi kompensasiya komitəsinin üzvləri — İdarə Heyətinin sədri Robyn Denholm və müstəqil direktor Kathleen Wilson-Thompson — Mask-ın digər sahələrdəki layihələrinə baxmayaraq, bu mükafatın onu Tesla-nın uzunmüddətli missiyasına bağlı saxlamaq üçün vacib olduğunu vurğulayıblar.

Komitə bildirib: “Əminik ki, bu mükafat İlon-un Tesla-da qalmasını təşviq edəcək".

Tərəfdarlar bu qərarın Mask-ın rəhbərliyinə olan inamı bərpa etdiyini düşünürlər. Tesla investoru Gary Black sosial platforma X-də bildirib ki, bu mükafat Mask-ın maraqlarını səhmdarlarla uzlaşdırır və onun istefa verəcəyi ilə bağlı narahatlıqları azaldır.

Tesla səhmlərinin son on ildə 2000%-lik artımına baxmayaraq, şirkətin səhmləri bu il 25% dəyər itirib. Bunun səbəbi kimi elektrikli avtomobil satışlarındakı yavaşlama, model çeşidinin köhnəlməsi və ABŞ-də verilən subsidiyaların azaldılması göstərilir.

Analitiklər 2025-ci ildə satışların yenidən azalacağını proqnozlaşdırırlar. Bu isə ötən ilki tənəzzülün davamı kimi qiymətləndirilir.

ANEWZ

Gülhüseynova Güllər