Tramp Həmas-a ultimatum verib

ABŞ Prezidenti Donald Tramp bazar günü Vaşinqton vaxtı ilə saat 18:00-a (yerli vaxtla bazar ertəsi gecə) qədər Hamasın atəşkəs razılaşmasına razılıq verməsi üçün son tarix qoyub.

Tramp cümə günü “Truth Social” platformasında yazıb:

“Bazar günü axşam saat 6-da, Vaşinqton vaxtı ilə Hamasla razılaşma əldə olunmalıdır. Hər bir ölkə buna imza atıb! Əgər bu "son şans" razılaşması baş tutmasa, Hamasın üzərinə misli görünməmiş ‘cəhənnəm’ enəcək. Yaxın Şərqdə sülh olacaq – ya bu yolla, ya da başqa yolla”.

Ağ Ev hələlik razılaşmanın detalları və hansı ölkələrin dəstəklədiyi barədə açıqlama verməyib. İsrailin şərtləri rəsmi şəkildə qəbul edib-etmədiyi də məlum deyil. Razılaşmaya əməl olunmadığı təqdirdə hansı addımların atılacağı da açıqlanmayıb.

Bu bəyanat Trampın 2025-ci ilin yanvarında hakimiyyətə qayıtdıqdan sonra Yaxın Şərqə dair verdiyi ən sərt xəbərdarlıqlardan biri hesab olunur. Son həftələrdə ABŞ bölgədə intensiv diplomatik səylər göstərib.

Hamas isə hələlik ultimatumla bağlı ictimai açıqlama verməyib. ABŞ, Qətər və Misirin vasitəçiliyi ilə aparılan danışıqlar isə İsrailin cənub Qəzzadakı hərbi əməliyyatları fonunda dəfələrlə dalana dirənib.

Ağ Evin bu gün günün ikinci yarısında əlavə açıqlama verməsi gözlənilir.

ANEWZ 

Güllər Gülhüseynova