Trampdan ilk mesaj

ABŞ Prezidenti Donald Tramp bəyan edib ki, İsrailin həyata keçirdiyi son hücumlar da daxil olmaqla, heç bir şey Qəzzədə atəşkəsi təhlükə altına almayacaq. O deyib: “Bir İsrail əsgəri öldürülüb, buna görə də onların cavab verməsi lazım idi. Bu, atəşkəsi təhlükəyə atan bir hücum deyil. Həmas Yaxın Şərqdə sülhün çox kiçik bir hissəsidir. Əgər yaxşı davranarlarsa, xoşbəxt olacaqlar. Əgər yaxşı davranmasalar, məhv ediləcəklər".

Tramp öldürülən İsrail əsgərinin vəziyyəti ilə bağlı dəqiq məlumatın olmadığını vurğulayıb: “Amma bunun snayper atəşi nəticəsində baş verdiyini və qarşılıq olaraq hücum edildiyini deyiblər”, – deyə əlavə edib. “Həmas daxilində sülhü pozmaq istəyən qüvvələr ola bilərmi?” sualına Tramp belə cavab verib: “Biz Həmasa rəhbərlik edən şəxslərlə danışdıq. Mənim fikrimcə, onlarla işləyən mütəxəssislərin rəyinə əsaslanaraq deyə bilərəm ki, insanlar öldürüləndə onlar bundan narahat olublar. Amma bəzi insanlar öldürülür və biz bunun baş verməsini istəmirik".

Tramp, həmçinin Şimali Koreyanın həyata keçirdiyi son raket sınağı ilə bağlı suala cavab verərək deyib: “Onlar illərdir raket atırlar, elə deyilmi? Sadəcə, daha bir raket".

O, Şimali Koreya lideri Kim Çen In ilə daha əvvəl görüşdüyünü və çox yaxşı münasibətləri olduğunu xatırladaraq bildirib: “Yəni, əlbəttə bir vaxt görüşəcəyik. Proqram çox sıxdır, amma səbirsizliklə gözləyirəm. Bizim çox yaxşı münasibətimiz olub. Bir-birimizi həqiqətən çox yaxşı anlayırdıq".

“Açıqlamanız bu səfər zamanı Kim Çen In ilə görüş olmayacağı anlamına gəlirmi?” sualına isə Tramp belə cavab verib: “Bilmirəm. İnsanlar cəhd edirlər, düşünürəm ki, istəyiblər, mən də istərdim, amma eyni zamanda Çinə diqqət yetirmək istəyirəm. Yəni, indi diqqətimiz sabahkı Çin görüşünə yönəlib. Amma biz geri dönəcəyik və çox da uzaq olmayan gələcəkdə Şimali Koreya ilə görüşəcəyik".

Haberler.com

Aygün Babayeva