Koreya-Vyetnam ticarət həcmi yüksəlir

Bölmə: Dünya › ,
Tarix: 20:55 11.08.2025

Cənubi Koreya Prezidenti Li Cae Myun bazar ertəsi Seulda Vyetnam Kommunist Partiyasının baş katibi To Lamı qəbul edib. Bu, prezident vəzifəsinə gəldikdən sonra Li üçün ilk rəsmi dövlət qonağıdır. Liderlər ABŞ-nin Cənubi Koreya və Vyetnam məhsullarına tətbiq etdiyi yeni tarifləri açıq müzakirə etməsələr də, ikitərəfli ticarət və investisiyaların qorunmasının vacibliyini vurğulayıblar.

 

Rəsmi məlumatlara görə, 2024-cü ildə Vyetnamın Cənubi Koreya ilə ticarət dövriyyəsi təxminən 86,8 milyard dollar olub. To Lam əlavə investisiyaları dəstəklədiyini bildirib və Vyetnamda artıq 10,000-dən çox Koreya şirkətinin fəaliyyət göstərdiyini qeyd edib. Li isə bu şirkətlərin Vyetnamın iqtisadi inkişafına və ölkələr arasındakı əməkdaşlığa töhfə verdiyini vurğulayıb.

 

Hökumətlər nüvə və bərpa olunan enerji, maliyyə, elm və texnologiya, yüksək sürətli dəmiryolu kimi sahələri əhatə edən 10 anlaşma memorandumu imzalayıblar. To Lam Seulda Yonsei Universitetində çıxışında Koreya şirkətlərini Vyetnamda fəaliyyətlərini genişləndirməyə çağırıb və təchizat zəncirlərinin parçalanmasının risklərinə diqqət çəkib.

 

O, yarımkeçiricilər, yeni materialların birgə inkişafı və Koreyanın Vyetnam işçilərinin süni intellekt, biotexnologiya və gəmiqayırma sahələrində təliminə dəstək verməsini tələb edib.

 

Samsung Electronics də daxil olmaqla böyük Koreya şirkətləri uzun müddətdir ki, əmək haqqının aşağı olması, vergi güzəştləri və Vyetnamın azad ticarət sazişləri şəbəkəsindən faydalanaraq, ölkəni istehsal və ixrac bazası kimi istifadə edir. Gələcək investisiya sahələri nüvə enerjisi, LNG elektrik stansiyaları və yüksək sürətli dəmiryolu layihələrini əhatə edə bilər.

 

ANEWZ

Güllər Gülhüseynova