Böyük Britaniyada milyonlarla müsəlman vətəndaşlığını itirmək riski ilə üzləşir

Böyük Britaniyada dərc olunan hesabatda milyonlarla Britaniya müsəlmanının vətəndaşlığı ləğv etmək səlahiyyətlərinin genişliyi səbəbindən vətəndaşlığını itirmək riski ilə üzləşdiyi bildirilir.

İrqçilik və bərabərsizlik sahəsində fəaliyyət göstərən Runnymede Trust fondu və Reprieve QHT hazırlanan hesabatda bildirilir ki, Böyük Britaniyada təxminən 9 milyon insan Daxili İşlər Nazirinin qərarı ilə qanuni olaraq vətəndaşlığından məhrum edilə bilər. Hesabatda bu rəqəmin ölkə əhalisinin təxminən 13 faizini təşkil etdiyi və bu səlahiyyətlərin böyük müsəlman əhalisi olan icmalara qeyri-mütənasib şəkildə təsir etdiyi qeyd olunur. Hesabatda mövcud təcrübələrin Cənubi Asiya, Yaxın Şərq və Afrika mənşəli icmalara qeyri-mütənasib şəkildə təsir etdiyi və bu səlahiyyətlərin müsəlman icmaları üçün "sistematik təhlükə"yə çevrildiyi vurğulanır. Hesabatda qeyd olunur ki, mövcud qanunlara əsasən, bir şəxsin başqa bir ölkə ilə faktiki əlaqəsi olmasa belə, Britaniya vətəndaşlığı ləğv edilə bilər, əgər o, vətəndaşlıq almaq hüququna malikdirsə. Pakistan, Banqladeş, Somali, Nigeriya, Şimali Afrika və Yaxın Şərqlə əlaqəsi olan şəxslər ən çox risk altında olan qruplar arasındadır. Hesabata görə, ağdərili olmayan beş nəfərdən üçünün vətəndaşlığını itirmək riski var, ağdərili britaniyalılar arasında isə bu rəqəm iyirmi nəfərdən biridir.

2022-ci ildə qəbul edilən Vətəndaşlıq və Sərhədlər Qanununun xəbərdarlıq etmədən vətəndaşlığın ləğvinə icazə verdiyini vurğulayan hesabatda həmçinin vurğulanır ki, bu il tətbiq edilən yeni qaydalarla hətta məhkəmələrin qanunsuz hesab etdiyi  qərarlar belə hökumətin apelyasiya prosesi başa çatana qədər ləğv edilə bilməz. Hər iki təşkilat vətəndaşlığın ləğvi təcrübələrinə dərhal moratorium qoyulmasını, Britaniya Vətəndaşlığı Qanununun müvafiq maddəsinin ləğv edilməsini və bu səlahiyyətlər çərçivəsində vətəndaşlığı ləğv edilənlərin hüquqlarının bərpa edilməsini tələb edib.

TRT Xəbər
Xədicə Məhərrəmli