Brown Universitetində şübhəli tapılıb

Polisin verdiyi məlumata görə, ötən həftə Brown Universitetində baş verən kütləvi atışmada şübhəli bilinən şəxs altı gün davam edən çoxştatlı axtarışdan sonra Nyu-Hempşir ştatının Salem şəhərində yerləşən bir anbar obyektində ölü tapılıb.

Şübhəli şəxs 48 yaşlı Klaudio Neves Valente kimi müəyyən edilib. O, Portuqaliya vətəndaşıdır və təxminən 25 il əvvəl Rod-Aylend ştatının Providens şəhərində yerləşən universitetdə təhsil alıb.

Providens polis rəisi Oskar Perez bildirib ki, video sübutlar və ictimaiyyətdən daxil olan məlumatlar istintaqçıları avtomobil icarəsi məntəqəsinə yönəldib. Orada şübhəlinin adına rast gəlinib və o, maraq dairəsində olan şəxslə eyniləşdirilib.

Rəsmilər həmçinin hesab edirlər ki, Valente 13 dekabr tarixində Brown Universitetində baş verən atışmadan iki gün sonra Massaçusets Texnologiya İnstitutunun (MIT) bir professorunu da qətlə yetirib.

BBC News
Səadət Əlizadə