Çin KOVID-19 epidemiyasında yeni infeksiya dalğası yaşayır

Çində KOVID-19-un Omikron alt variantı olan XBB-nin yaratdığı epidemiyada iyun ayının əvvəlindən etibarən yoluxma sayının həftədə 11 milyon ilə pik həddinə çatacağı gözlənilir.

İnformator.az qərb mediasına istinadən xəbər verir ki, Airfinity sağlamlıq məlumat xidmətləri və analiz şirkəti tərəfindən dərc edilən təhlilə əsasən, epidemiyanın ümumilikdə 112 milyon insanı əhatə etdiyi təxmin edilir.

Qış aylarında 1 milyarddan çox insanın yoluxduğu epidemiya ilə müqayisədə yeni epidemiya dalğasının daha məhdud yayıldığı müşahidə edilir. Şirkət bu infeksiya dalğasında 629 min ölüm olacağını proqnozlaşdırır. Şirkət qış aylarında böyük epidemiya dalğasında 1,3 milyondan 2,1 milyona qədər insanın öldüyünü təxmin edir.

Çində son epidemiya dalğası ilə bağlı rəsmi məlumat yoxdur. Xəstəliklərə Nəzarət və Qarşısının Alınması Mərkəzi Ümumdünya Səhiyyə Təşkilatının mayın əvvəlində KOVID-19-un "qlobal sağlamlıq fövqəladə halı" hesab edilməyəcəyini elan etməsindən sonra həftəlik müsbət testlərin və klinikalara ziyarətlərin sayını bildirməyi dayandırıb.