VII Ümumdünya Mədəniyyətlərarası Dialoq Forumunun açılışında Prezident İlham Əliyev Azərbaycanın müstəqil siyasəti və beynəlxalq münasibətlərdəki mövqeyi barədə danışıb. Dövlət başçısı ölkəyə qarşı ikili standartların yolverilməz olduğunu vurğulayıb və Azərbaycanın belə hallara qətiyyətlə cavab verəcəyini bildirib.

Bu barədə "İnformator.az"a açıqlamasında  siyasi ekspert Yusif Bağırzadə bildirir ki, Prezidentin bəyanatı Azərbaycanın xarici siyasətində müstəqil qərarverməyə, milli maraqların qorunmasına və beynəlxalq münasibətlərdə qarşılıqlı hörmət prinsipinə verilən əhəmiyyəti əks etdirir:

"Prezident İlham Əliyevin bəyanatı Azərbaycanın xarici siyasətində müstəqil qərarvermə və milli maraqların qorunması prinsiplərinin əhəmiyyətini bir daha önə çıxarır. Müasir beynəlxalq münasibətlər sistemində dövlətlərin müstəqil mövqe tutması onların iqtisadi dayanıqlığından, enerji və nəqliyyat infrastrukturundan, müdafiə potensialından və diplomatik əlaqələrindən asılıdır.

Beynəlxalq münasibətlərdə ikili standartların tətbiqi dövlətlər arasında etimadın zəifləməsinə və mübahisələrin həllinin çətinləşməsinə səbəb olur. Bu baxımdan, beynəlxalq hüququn bütün dövlətlərə bərabər şəkildə tətbiqi mühüm əhəmiyyət daşıyır".

Politoloq  qeyd edir ki, Azərbaycan xarici siyasətini milli maraqlar əsasında qurur. Türkiyə ilə müttəfiqlik, Avropa ilə enerji əməkdaşlığı, Mərkəzi Asiya və qonşu dövlətlərlə iqtisadi əlaqələr ölkənin beynəlxalq mövqeyini gücləndirir:

"Azərbaycanın enerji və nəqliyyat imkanları da ölkənin beynəlxalq əhəmiyyətini artıran əsas amillərdəndir. Ölkənin Avropanın enerji təhlükəsizliyində iştirakı, Xəzər hövzəsini Qərb istiqamətləri ilə birləşdirən nəqliyyat marşrutları və regional logistika imkanları beynəlxalq əməkdaşlığın genişlənməsinə töhfə verir.

Dövlətlər arasında qarşılıqlı hörmətin qorunması üçün diplomatik dialoqun gücləndirilməsi və beynəlxalq hüquq normalarına riayət olunması vacibdir. Mübahisələrin danışıqlar yolu ilə həlli, iqtisadi münasibətlərin qarşılıqlı fayda prinsipi əsasında qurulması və beynəlxalq təşkilatlarda ardıcıl mövqe nümayiş etdirilməsi bu istiqamətdə əhəmiyyətlidir".

Ayan Məmmədzadə