"Səudiyyə Ərəbistanı husilərin hava limanına hücumuna cavab vermək məcburiyyətində qalacaq, lakin qarşısında duran seçimlər kifayət qədər aydındır".

Səudiyyə Ərəbistanı ərazisində son on ildən artıq müddətdə baş vermiş ən ölümcül hücumla üzləşərkən, Yəməndə İranın dəstəklədiyi husilərin ölkədə törətdiyi dağıntılara Ər-Riyadın necə cavab verəcəyi ilə bağlı suallar yaranır.

Səudiyyə Ərəbistanı ötən həftə husilərlə döyüşən Yəmən hökumət qüvvələrinə dəstək vermək üçün genişmiqyaslı əməliyyata başlayıb. Lakin üsyançılar indiyədək öz mövqelərini qoruyub saxlaya biliblər.

Əksinə, onlar Səudiyyə Ərəbistanına qarşı hücumlarını daha da gücləndiriblər. Bu hücumlar həftəsonu Ər-Riyaddakı Kral Xalid Beynəlxalq Hava Limanına raket zərbələri endirilməsi ilə nəticələnib. Hücumlar nəticəsində ən azı 13 nəfər həyatını itirib.

İranın ABŞ ilə qarşıdurmasında istifadə etdiyi taktikalardan nümunə götürən husilər Səudiyyə Ərəbistanının mühüm infrastruktur obyektlərini hədəfə almaqla və qlobal iqtisadiyyata zərər vurmaqla hücumları daha da gücləndirəcəklərini bildirirlər.

Husilərin Səudiyyə Ərəbistanına qarşı uzun müddətdir davam edən narazılıqlarının əsas səbəbi Ər-Riyadın bu qrupa qarşı on il ərzində apardığı müharibədir. Həmin müharibə dünyanın ən böyük humanitar böhranlarından birinə səbəb olub. Lakin son dövrlərdə husilərin hücumlarının güclənməsi getdikcə İranın Vaşinqtonla qarşıdurmasının davamı kimi qiymətləndirilir.

Səudiyyə Ərəbistanının vəliəhd şahzadəsi Məhəmməd bin Salman və onun qardaşı, müdafiə naziri Xalid bin Salman 11 ildir ki, husilərin irəliləyişini hərbi əməliyyatlar və danışıqlar yolu ilə dayandırmağa çalışırlar. Lakin hazırda onların seçimləri məhduddur.

Sərhədin digər tərəfində isə husilər daha da güclənərək böyük şəhərlər üzərində nəzarətlərini möhkəmləndiriblər. Onlar həmçinin Təiz kimi əhalinin sıx yaşadığı digər şəhərləri ələ keçirmək üçün təzyiqlərini artırırlar.

Səudiyyə Ərəbistanı siyasəti üzrə şərhçi və müəllif Əli Şihabi CNN-ə açıqlamasında bildirib:

“Bu təhlükə mümkün qədər tez aradan qaldırılmalıdır. Bir çox məsələ Yəmən hökumət qüvvələrinin döyüş meydanında göstərəcəyi nəticələrdən asılı olacaq. Səudiyyə Ərəbistanı onlara hava qüvvələri ilə geniş dəstək verir".

CNN XƏBƏR 

Ayan Məmmədzadə