Xarici İşlər Naziri Hakan Fidan hansı mesajları verəcək?

Diplomatiya forumunun keçirildiyi Antalya daha bir mühüm görüşə ev sahibliyi edəcək. Türkiyə-Bosniya və Herseqovina-Xorvatiya üçtərəfli məsləhətləşmə mexanizmi çərçivəsində Xarici İşlər nazirləri onuncu dəfə bir araya gələcək. Xarici İşlər naziri Hakan Fidan, həmkarlarına mühüm mesajlar verəcək.

10-CU GÖRÜŞƏ ANTALYA EV SAHİBLİYİ EDİR

Türkiyə-Bosniya və Herseqovina-Xorvatiya üçtərəfli məsləhətləşmə mexanizmi çərçivəsində Xarici İşlər nazirləri Antalyada bir araya gəlir. Diplomatiya forumu çərçivəsində keçiriləcək görüş 12 aprel tarixində baş tutacaq. Bəs Xarici İşlər naziri Hakan Fidan hansı mesajları verəcək?

Fidan, Bosniya və Herseqovinanın Serb hissəsinin rəhbəri Milorad Dodik barəsində çıxarılan hökmdən sonra yaşanan proseslərin və hadisələrin yaxından izlənildiyini bildirəcək. O, Bosniya və Herseqovinanın Dayton Sülh Razılaşması əsasında ərazi bütövlüyünü, konstitusiya quruluşunu, iki entitet və üç əsas qurucu xalqdan ibarət suveren dövlət quruluşunu qorumasının əhəmiyyətini vurğulayacaq.

TÜRKİYƏ, BOSNİYA VƏ HERSEQOVİNA, XORVATİYA MASA ARXASINA ƏYLƏŞƏCƏK

Fidan, Bosniya və Herseqovinanın Serb hissəsində artan separatçı fəaliyyət və bəyanatların qəbuledilməz olduğunu qeyd edəcək. O, ölkədəki gərginliyin aradan qaldırılması üçün təcili səylərin göstərilməsinin vacibliyini vurğulayacaq.

Nazir Fidan, Bosniya və Herseqovina ilə Xorvatiya arasındakı münasibətlərin bölgədə davamlı sülh və sabitliyin təmin olunması baxımından əhəmiyyət daşıdığını vurğulayacaq.

Üç ölkə arasında 2010-cu ildə yaradılmış məsləhətləşmə mexanizmi, regional problemlərə regional həll yolları tapmaq prinsipi ilə Balkanlarda əməkdaşlığın artırılmasına və sabitliyə, konkret layihələr vasitəsilə isə regional inkişafa töhfə verir. Bu günə qədər xarici işlər nazirləri səviyyəsində doqquz görüş keçirilib. Sonuncu görüş isə Xorvatiyanın ev sahibliyində 29 iyun 2024-cü il tarixində baş tutub.

CNN Türk

Günel Verdiyeva