Almaniyanın Hannover hava limanında hava nəqliyyatı pozulub

Almaniyanın Hannover hava limanında naməlum mənşəli dron göründüyü üçün uçuş əməliyyatları müvəqqəti olaraq dayandırılıb və bəzi təyyarələr digər hava limanlarına yönləndirilib.

Polis dünən axşam hava limanına yaxınlaşan təyyarənin pilotunun uçan bir obyekt gördüyünü və bu barədə səlahiyyətlilərə məlumat verdiyini açıqlayıb.Açıqlamaya görə, uçuş əməliyyatları yerli vaxtla saat 22:00 ilə 22:45 arasında Hannover hava limanında naməlum mənşəli dron göründüyü üçün tamamilə dayandırılıb.
Açıqlamada həmçinin bəzi təyyarələrin digər hava limanlarına yönləndirildiyi bildirilib. Hollandiyanın paytaxtı Amsterdamdan yola düşən sərnişin təyyarəsinin Osnabrük üzərindən geri dönərək Amsterdama eniş etdiyi bildirilib.

Frankfurtdan yola düşən təyyarə Hamburqa, yük təyyarəsi isə Köln Bonn hava limanına eniş edib. Almaniya Hava Nəqliyyatı Nəzarəti (DFS) bu ilin sentyabr ayının sonuna qədər təkcə Hannover hava limanında dronların yaratdığı beş pozuntu qeydə aldığını açıqlayıb. Dronların, xüsusən də hava limanları ətrafında əhəmiyyətli təhlükəsizlik riski yaratdığı və uçuş və enişləri təhlükə altına ala biləcəyi üçün hava limanlarından 1,5 kilometr radiusda uçmasının qadağan edildiyi vurğulanıb.

TRT Xəbər
Xədicə Məhərrəmli