Belçika yanvarın 1-ə qədər Hava Təhlükəsizliyi Mərkəzi yaradacaq

Belçika 2026-cı il yanvarın 1-ə qədər Milli Hava Təhlükəsizliyi Mərkəzi yaradacaq.

"İnformator.az" xəbər verir ki, bu barədə Belçikanın müdafiə naziri Teo Franken hərbi bazalar üzərində naməlum PUA-ların uçuşu ilə əlaqədar Milli Təhlükəsizlik Şurasının çağırılan iclasından sonra bildirib.

"Təhlükəsizlik Şurası dronlarla bağlı son insidentləri araşdırdı. Aydın qərar qəbul edildi - 1 yanvar 2026-cı ilə qədər Milli Hava Təhlükəsizliyi Mərkəzi fəaliyyətə başlayacaq. Mərkəz Belçika hava məkanının optimal müşahidəsini və müdafiəsini təmin edəcək", - nazir qeyd edib.

Bundan əvvəl ölkənin Müdafiə Nazirliyinin 500 milyon avro məbləğində dronlarla mübarizə layihəsini hökumətə təqdim etdiyi barədə məlumat verilib.